Даваа гарагт 2-оос дээш хувиар өссөн алтны үнэ сүүлийн хоёр долоо хоногийн дээд түвшинд хүрчээ. АНУ-ын эдийн засгийн статистик мэдээлэл нь Холбооны нөөцийн сан бодлогын хүүгээ бууруулах магадлалыг нэмэгдүүлснээр алтны эрэлт өссөн байна.

Тодруулбал, нэг унц алтны үнэ 4079.71 ам.долларт хүрчээ. Энэ нь 10 дугаар сарын 27-ноос хойших хамгийн өндөр үзүүлэлт болж байна. Мөн 12 дугаар сард нийлүүлэх алтны фьючерс хэлцлийн үнэ 2 хувиар өссөнөөр 4090.80 ам.долларт хүрчээ. Ам.долларын ханш буурсан нь гадаадын худалдан авагчдад алтыг илүү хямд болгож байна.

“Өнгөрсөн долоо хоногт танилцуулсан эдийн засгийн зарим үзүүлэлт нь Холбооны нөөцийн сан хүүгээ бууруулах магадлалыг нэмэгдүүлсэн. 12 дугаар сард бодлогын хүү буурах магадлалтай байна” гэж “Zaner Metals” компанийн дэд ерөнхийлөгч, металлын ахлах стратегич Питер Грант хэлжээ.

Өнгөрсөн долоо хоногийн статистик мэдээллээс үзэхэд, АНУ-д 10 дугаар сард ажлын байрны тоо буурч, засгийн газар болон жижиглэнгийн худалдааны салбар алдагдал хүлээсэн байна. Түүнчлэн өрхүүд эдийн засгийн уналтын талаар санаа зовниж байгаа тул Америкийн хэрэглэгчдийн сэтгэл ханамж 11 дүгээр сарын эхээр унасныг баасан гаргийн мэдээлэл харуулжээ.

“CME Group”-ийн “FedWatch” хэрэгслийн мэдээлснээр, 12 дугаар сард бодлогын хүүг бууруулах магадлал 67 хувьтай байгаа бөгөөд нэгдүгээр сар гэхэд энэ магадлал 80 хувь орчим болж өсөх төлөвтэй байна.  Бодлогын хүү бага үед болон эдийн засгийн тодорхойгүй байдлын үед алтны үнэ өсдөг.

Алтны үнэ оны эцэс гэхэд 4200-4300 ам.долларын хооронд хэлбэлзэх магадлалтай байгаа бөгөөд ирэх оны эхний улиралд 5000 ам.долларт хүрэх нь бодит үндэслэлтэй таамаглал хэвээр байна гэж П.Грант нэмж хэлжээ. Мөн даваа гарагт мөнгөний үнэ 3.2 хувиар өсөж, унц нь 49.84 ам.доллар болсон нь 10 дугаар сарын 21-нээс хойших хамгийн өндөр үзүүлэлт бөгөөд цагаан алтны үнэ 1.4 хувиар өссөнөөр 1566.08 ам.доллар, палладийн үнэ 1.1 хувиар өсөж 1396.50 ам.долларт тус тус хүрсэн байна.

Эх сурвалж: Reuters