“Монгол бөхийн өргөө”-ний үйл ажиллагаа зогсож, өргөөнд бөхийн барилдаан зохион байгуулагдалгүй гурван сар гаруйн хугацаа өнгөрч байна. Өнөөдөр Монголын үндэсний бөхийн холбооны тэргүүн, УИХ-ын гишүүн Б.Бат-Эрдэнэ, дархан аварга, Хөдөлмөрийн баатар Х.Баянмөнх нар уулзаж, зөвшилцөлд хүрчээ. Энэхүү уулзалтаар Бөхчүүдийн түр зөвлөлийг байгуулж хамтран ажиллахаар болж Бөхийн өргөөг нээж, үйл ажиллагааг хэвийн явуулахыг яаравчлахад санал нэгджээ. Хоёр талын уулзалтад дархан аварга Х.Баянмөнх, холбооны тэргүүн Б.Бат-Эрдэнэ, дэд тэргүүн Ц.Магалжав, гүйцэтгэх захирал Б.Сайнбаяр нарын төлөөлөл оролцсон байна.

Х.Баянмөнх аварга “Бөхийн өргөөний асуудал сунжраад гурван сар гаруй хугацаа өнгөрлөө. Энэ хугацаанд түгжээтэй байгаа. Дотор нь халуун ус, тог цахилгаан нь юу болж байгаа юм бүү мэд. Бөхийн өргөөндөө орж барилдах бөхчүүд нь бэлтгэлээ хийгээд бэлэн байдаг. Бөх сонирхогчид нь бөхийн барилдаанаа өргөөндөө үзэхээр хүлээгээд байдаг. Тэгэхээр энэ зүйл дээр их цаг алдаад байгааг бөхчүүд маань хэлж байна. Энэ асуудлыг чи бид хоёр л зохицуулах ёстой гэдгийг бөхчүүд болон бөх сонирхогчид хэлж байна. Шүүхээрээ явдаг л юм байж. Хууль, шүүх нь шийдтэл түр зөвлөл байгуулж, Бөхийн өргөөний үйл ажиллагааг хэвийн явуулах, ард түмний хүлээж буй үүргээ ухамсарлаж шийдэх хэрэгтэй байна” гэлээ. 

Хариуд нь УИХ-н гишүүн Б.Бат-Эрдэнэ “Таньтай санал нэг байна. 2018 оны гуравдугаар сард Бөхийн холбооны наймдугаар “Их Эе” хуралдаад бөхчүүдийн 80 орчим хувь нь оролцож энэ хурлаас намайг Тэргүүнээр сонгож, та энэ маргаантай байгаа асуудлыг цэгцлэх хэрэгтэй байна гэсэн. Ингээд би энэ асуудалд ороод явж байна. Түүнээс хойшхи асуудал тодорхой байгаа. Би тантай уулзаад есдүгээр сард хурлаа хийе ээ гэсэн санал тавьсан. Гэвч есдүгээр сард сургууль соёл, тариа будаа гээд ажил хойшлоно гэсэн учраас 10, 11 дүгээр сард гэсэн. Арваннэгдүгээр сарын 23-нд хэдэн залуусаа явуулаад тантай уулзуулсан. Та бүхэн маань сайхан санал тавьсан учраас өнөөдөр уулзаад бөхийн хамт олон оролцсон тэр тусмаа хоёулаа 10, 10-аад түрүүлчихсэн хоёр дархан аварга энэ ачааг үүрч, бөхийн хамт олноо удирдах болж байна. Үзэгчид олон түмнийхээ санал хүсэлтэд нийцсэн, Бөхийн өргөөний үйл ажиллагааг хэвийн явуулах, нэг тал руугаа багтсан шийдвэр гаргах гэж байгаад би их баяртай байна. Хоёулаа энэ холбооныхоо тэргүүнд сууж байгаагийн хувьд энэ асуудлыг нааштай шийдэж, шийдвэр гаргая. Өнгөрсөн хугацаанд сайхан зүйл л байснаас саар зүйл байгаагүй шүү. Тамирчдынхаа баярын өдөр хоёулаа Өргөөгөө нээчихвэл сайхан байна” гэв. 

Өнгөрсөн хугацаанд Монгол Улсын Ерөнхийлөгч хоёр удаа Монголын үндэсний бөхийн холбоонд сануулга өгч, Бөхийн өргөөг төрийн өмчид шилжүүлэн авах асуудлаар Ерөнхий сайдад хандсан байдаг. Гэвч асуудал өнөөг хүртэлд шийдэгдээгүй байгаа юм. 

Монголын үндэсний бөхийн холбооны тэргүүн Б.Бат-Эрдэнэ, дархан аварга, Хөдөлмөрийн баатар Х.Баянмөнх ийн ярилцаж, түр хороогоо байгууллаа.