Монгол Улсын Ерөнхийлөгч У.Хүрэлсүх “Хүнсний хангамж, аюулгүй байдал” үндэсний хөдөлгөөний хэрэгжилтийн хүрээнд үндэсний үйлдвэрлэгчдийн үйл ажиллагаатай танилцлаа.

Ерөнхийлөгчийн зочилсон “Об пластик” ХХК тус хөтөлбөрийн хүрээнд 5 тэрбум төгрөгийн зээл авч, хуванцар савны үйлдвэрээ ашиглалтад оруулсан байна. Үйлдвэр нь өндөг, жимс, хүнсний бүтээгдэхүүний зориулалттай 16 төрлийн сав баглаа боодол үйлдвэрлэж, зах зээлд нийлүүлж эхэлжээ.

Хүнсний үйлдвэрлэлийн дэмжлэгийн хүрээнд нийт 14 аж ахуйн нэгж 27.4 тэрбум төгрөгийн зээл авч, дотоодын үйлдвэрлэл 18 хувиар, татварын орлого 14 хувиар өссөн байна. Ирээдүйд импортын бараанд 20 хувийн босго тогтоох, хүний нөөцийн сургалт болон хүнсний зориулалтын бус савны хэрэглээг бууруулах бодлого баримтлах санал гарчээ.

Мөн Ерөнхийлөгч “Жүр үр” ХХК-ийн шинэ үйлдвэртэй танилцсан бөгөөд тус компани 10,000 м.кв талбай бүхий шинэ үйлдвэрийн барилгаа ашиглалтад оруулж, Герман, Итали, Нидерландын тоног төхөөрөмжөөр бүрэн тоногложээ. Үйлдвэрийн хүчин чадал 50–200 хувиар өсөж, 1,200 гаруй ажлын байрыг хадгалж байна.

“Хүнсний хангамж, аюулгүй байдал” үндэсний хөдөлгөөнд 3,000 гаруй аж ахуйн нэгж 1.2 их наяд төгрөгийн зээл, харин “Цагаан алт” хөтөлбөрийн хүрээнд 300 тэрбум төгрөгийн татварын хөнгөлөлт, зээлийн хүүгийн дэмжлэг авсан байна.

Ерөнхийлөгч У.Хүрэлсүх дотоодын үйлдвэрлэлийг нэмэгдүүлж, гол нэр төрлийн 19 бүтээгдэхүүнээр дотоодын хэрэгцээгээ хангах зорилтод хувь нэмэр оруулж буй үйлдвэрлэгчиддээ талархал илэрхийллээ.

Эх сурвалж: Ерөнхийлөгчийн хэвлэл мэдээллийн алба