Улаанбаатар-Налайхын чиглэлийн авто замаас эхлэн баруун аймгууд руу салдаг аюулгүйн тойрог хүртэл үргэлжлэх Туулын хурдны зам төслийн бэлтгэл ажил ид өрнөж байна. Одоогоор 2000 м.кв талбайд дайрга дэвсэж тэгшлэх, дам нурууны угсрах талбайг хусаж нягтруулах, 24000 м.куб хайрга дайрга дэвсэх ажлууд бүрэн дууссан байна. Мөн төслийн кемпийн 2000 м.кв талбайд дайрга дэвсэж тэгшилж, 1000 м.кв талбайд бетон цутгалт хийжээ.
Төслийн талбайн дөрвөн байршилд түр зам барих ажил эхэлсэн бөгөөд энэ ажлыг арваннэгдүгээр сард бүрэн дуусгахаар төлөвлөсөн байна. Мөн орчны ногоон байгууламжийг хамгаалах хүрээнд 1000 ширхэг модыг Баянгол дүүргийн цэцэрлэгт хүрээлэнд шилжүүлэн суулгажээ.
Туулын хурдны зам нь зургаан эгнээтэй, 32 км урт үргэлжилж, нийт долоон орц, гарц, найман байршилд хоёр түвшний уулзвар, 9.8 км урт гүүр, дөрвөн байршилд 190 метрийн урт туннельтэйгээр төлөвлөгдсөн байна. Тус зам ашиглалтад орсноор Энхтайваны, Яармагийн, Сонсголонгийн болон Наадамчдын гүүрний ачааллыг бууруулж, түгжрэлийг 40 гаруй хувиар бууруулах тооцоолол гарчээ.
Төслийн гүйцэтгэгчээр “ХаоЮань групп” ХХК ажиллаж байгаа бөгөөд тус компани нь Хонгконгт төвтэй, олон улсын дэд бүтцийн томоохон төслүүдийг хэрэгжүүлж ирсэн туршлагатай байгууллага юм.
Туулын хурдны зам нь Улаанбаатар хотыг 2040 он хүртэл хөгжүүлэх ерөнхий төлөвлөгөөнд тусгагдсан бөгөөд 2025-2027 онд барилгын ажлыг бүрэн гүйцэтгэхээр төлөвлөсөн. Энэ төсөл хэрэгжсэнээр нийслэлийн авто замын сүлжээ шинэ шатанд гарч, хөдөлгөөний үр ашиг, эдийн засгийн өсөлт, иргэдийн цаг хугацааг хэмнэхэд чухал нөлөө үзүүлэх юм.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.
