Монгол Улсад энэ оны нэгдүгээр сарын нэгнээс аравдугаар сарын хорин зургааныг хүртэл хугацаанд нийт 751879 жуулчин иржээ. Тэдгээрийн дийлэнх нь Бүгд Найрамдах Хятад Ард Улс, Бүгд Найрамдах Солонгос Улс, Оросын Холбооны Улс болон Япон Улсын иргэд байгаа аж.
Жуулчид ихэвчлэн аяллаа Улаанбаатар хотоос эхлүүлж, төв талбай, Түүхийн музей, Гандантэгчэнлин хийд, Зайсан толгой зэрэг сонирхол татах газруудыг үздэг. Үүний дараа Өмнөговийн Хонгорын элс, Ёлын ам, Өвөрхангай аймгийн Хархорины туурь, Эрдэнэ зуу хийд, Орхоны хөндий, Элсэн тасархай болон Баян-Өлгий аймгийн Алтай Таван Богдын үндэсний парк, Хөвсгөл нуурыг зорин аялдаг байна.
Өнгөрсөн онд Монгол Улсыг 727 мянга гаруй жуулчин зорин ирсэн бол энэ оны аравдугаар сар хүртэлх үзүүлэлт өмнөх жилийн дүнг давж, аялал жуулчлал сэргэж буйн илэрхийлэл боллоо.
Эх сурвалж: Байгаль орчин, аялал жуулчлалын яам.
