Өнөөдөр болсон Засгийн газрын ээлжит бус хуралдаанаар АИ-92 автобензиний импорт, тээвэрлэлт, борлуулалтын нөхцөл байдлыг хэлэлцлээ. Хуралдааны үеэр шатахууны аюулгүйн нөөц бүрдүүлэх зорилгоор нэг удаагийн үйлчлэлтэй хуулийн төсөл санаачлан УИХ-д өргөн мэдүүлэхээр тогтов.

Аж үйлдвэр, эрдэс баялгийн сайд Г.Дамдинням мэдээлэхдээ, өнөөдрөөс эхлэн Улаанбаатар хотын шатахуун түгээх станцууд хэрэглэгчдэд тавьсан хязгаарлалтыг цуцалж байгаа тухай мэдэгдэв.

Өглөөний найман цагийн байдлаар нийт 86 вагон шатахуун орж ирсэн бөгөөд Толгойт өртөөнд 16, Аршаант 6, Улаанбаатар 5, Дархан 10, Сайншанд 5, Эрдэнэт 10, Сүхбаатар өртөөнд 34 вагон байрлаж байна. Мөн нийслэлийн шатахуун импортлогчдын агуулахад 2,824 тонн АИ-92 автобензин байгаагийн дээр 30 вагон буюу 1,800 тонн шатахуун нэмж буусан байна.

Агуулахад орсон шатахуунаас 1,169 тонныг нийслэлийн 115 шатахуун түгээх станцад, 592 тонныг орон нутгийн станцууд руу ачжээ.

Эх сурвалж: Засгийн газрын Хэвлэл мэдээлэл, олон нийттэй харилцах газар