Хөрөнгө оруулагчдын эрэлт ихээхэн нэмэгдэж байгаатай холбоотойгоор биткоины ханш даваа гарагт түүхэн дээд үзүүлэлтэд хүрчээ.
Биткоины ханш он гарснаас хойш өсөж байгаа бөгөөд үүнд институцийн хөрөнгө оруулагчид, АНУ-ын Ерөнхийлөгч Дональд Трампын ээлтэй бодлого, мөн биткоин дэлхийн санхүүгийн системүүдтэй улам бүр холбогдож буй зэрэг хүчин зүйлс нөлөөлж байна.
Өнгөрсөн ням гарагт биткоины ханш түүхэндээ анх удаа 125 мянган ам.доллароос дээшилснийхээ дараа 125835.92 ам.долларт хүрч өсжээ. Ингэснээр уг криптовалютын ханш энэ он гарсаар 33 гаруй хувиар өсөөд байна.
Биткоины өсөлт нь АНУ-ын худалдааны түншүүдэд Д.Трампын ногдуулсан татвар тариф болон түүнээс үүдэлтэй нөлөөллийн тодорхойгүй байдал нь хөрөнгө оруулагчдыг хөрөнгөө төрөлжүүлэхэд хүргээд байгаа энэ үед ам.долларын ханш бусад томоохон валютуудын эсрэг сулраад байгаатай давхцаж байна. Иен, евро зэрэг валюттай харьцах ам.долларын индекс энэ онд ойролцоогоор 10 хувиар буурчээ.
“Биткоины ханш долоо хоногийн өмнө түр зуур 110 мянган ам.доллароос доошилсноосоо хойш өссөөр байна. Одоогийн өсөлт нь есдүгээр сарын 28-наас хойш ойролцоогоор 13 хувиар өссөн гэсэн үг юм” гэж “Trade Nation” платформын ахлах зах зээлийн шинжээч Дэвид Моррисон хэлсэн байна.
Эх сурвалж: Reuters
