Азийн хөрөнгийн зах зээлийн индексүүд түүхэн дээд түвшинд хүрч өссөн тухай  "Bloomberg" агентлаг даваа гаргийн өглөөний арилжааны мэдээллийг эш татан мэдээлжээ. 

Азийн хөрөнгийн зах зээлийг хэмждэг MSCI индекс зургаа дахь өдрөө дараалан өссөн бол Японы хөрөнгийн биржийн Nikkei 225 индекс 4.8 хувиар өссөн байна. Хөрөнгө оруулагчдын итгэл ийнхүү сэргэснийг шинжээчид татварыг бууруулж, эдийн засгийг эрчимжүүлэх бодлогыг дэмждэг, Японы эрх баригч Либерал Ардчилсан намын шинэ дарга Такаичи Санаэ тус улсын Ерөнхий сайдаар томилогдох магадлалтай байгаатай холбон тайлбарлаж байна. 

“Хөрөнгө оруулагчид эдийн засгийг дэмжих арга хэмжээний боломжит үр өгөөжийг бондын зах зээлийн эрсдэлтэй нухацтай харьцуулж байна. Тэд Японы татвар-санхүүгийн болон мөнгөний бодлогын уялдаа холбоо, бондын зах зээлийн хөдөлгөөн, мөн иений хэлбэлзлийг анхааралтай ажиглах шаардлагатай. Эдгээр хүчин зүйл нь ирэх хэдэн долоо хоногт хөрөнгийн сонголт хийхэд гол хүчин зүйлс болно” хэмээн “Pepperstone Group”-ийн стратегич Дилин Вү хэлжээ.

Иенийн ханш 1.6 хувиар суларч, нэг ам.доллар 150 иений түвшин рүү дөхсөн бол нэг евротой тэнцэх иенийн ханш мөн түүхэн доод түвшинд хүрсэн байна. Японы харьцангуй урт хугацаатай бондуудын үнэ сүүлийн саруудын дотор хамгийн огцом унасан бол 40 жилийн хугацаатай бондын өгөөж 14 суурь нэгжээр өсжээ. Энэ нь Такаичи тэргүүтэй шинэ засгийн газар татварыг бууруулах, эдийн засгийг эрчимжүүлэх арга хэмжээг санхүүжүүлэхийн тулд илүү их бонд гаргаж магадгүй гэсэн хөрөнгө оруулагчдын болгоомжлолтой холбоотой байна.

Батлан хамгаалах тоног төхөөрөмж үйлдвэрлэгч "Kawasaki Heavy Industries Ltd", "Japan Steel Works Ltd." болон "IHI Corp." компаниудын хувьцаа төрийн зардлыг нэмэгдүүлснээр ашиг хүртэнэ гэсэн таамаглалтай холбоотойгоор хэсэг хугацаанд 10 орчим хувиар өссөн байна. Японы анхны эмэгтэй Ерөнхий сайд болох төлөвтэй байгаа Такаичи Санаэ бол эдийн засгийг эрчимжүүлэх бодлогыг дэмждэг, консерватив үзэлт улс төрч юм. Тэрбээр үндсэрхэг үзэлтэн бөгөөд Их Британийн анхны эмэгтэй Ерөнхий сайд “Төмөр хатагтай” Маргарет Тэтчерийг биширдэг, Iron Maiden хэмээх хеви-металл хамтлагийн шүтэн бишрэгч нэгэн юм гэж "Bloomberg" онцолжээ.

Эх сурвалж: Forbes