Судлаачдын зүгээс жилээс жилд нэмэгдэж буй төсвийн алдагдал нь ирээдүй хойчдоо өв биш, харин өр үлдээж байгааг анхааруулж байна. Энэ жилийн төсвийн алдагдал 1,5 их наяд төгрөгт хүрэх бөгөөд үүнийг долларт шилжүүлбэл 450 сая ам.доллар болж, жилд 6,5%-ийн хүүтэй зээлэх нөхцөл үүснэ.

Эдийн засагчдын хэлснээр, иргэдээс санал авч боловсруулсан энэ жилийн төсвийн төсөл нь оновчтой шийдэл болсон аж. Тодруулбал, эрүүл мэндийн салбарын төсөв өнгөрсөн жилээс тав дахин өсч, боловсролын салбарын төсөв хоёр дахин, дижитал шилжилтийн төсөв 3,5 дахин нэмэгдсэн нь иргэдийн саналыг тусгасан үр дүнтэй алхам болжээ. Гэвч боловсролын салбарын нэмэгдсэн 100 тэрбум төгрөгийн ихэнх нь цалин хөлсөд зориулагдсан бөгөөд сургууль барьж, хөрөнгө оруулалт хийх төсөв өмнө нь төлөвлөсөн хэмжээндээ байсан ч ээлжийн коэффициент буурах нөлөө нь бодитойгоор мэдэгдэхгүй байгаа юм.

Төсвийн нийт зээлийн бүтцийг авч үзвэл 96 хувь нь гадаад, 4 хувь нь дотоод зээллэг байгаа нь ханшийн хэлбэлзлээс шууд нөлөөлж болзошгүйг эдийн засагчид анхааруулж байна. Судлаачдын дүгнэлтээр, урсгал зардлын өсөлтийг хязгаарлаж, хөрөнгө оруулалтын төслүүдийг эдийн засгийн үр ашиг, нийгмийн ач холбогдлоор эрэмбэлэх шаардлагатай аж.

Мөн уур уурхайгаас гадна татварын орлогыг нэмэгдүүлэх, олон нийтийн оролцоог бодитойгоор хангах чиглэлд анхаарах шаардлага байгааг мэргэжилтнүүд онцолж байна. Эдийн засгийн өсөлтийг дэмжих, мөчлөгт сөрсөн бодлого баримтлах зорилгоор алдагдалтай төсөв баталж байгаа ч энэ нь эдийн засгийн тогтвортой байдлыг хангах урт хугацааны стратегийн нэг хэсэг юм.

Өнгөрсөн жилүүдэд төсвийн хууль эрх зүйн орчны олон шинэчлэлүүдээс үүдэн төсөв эмх замбараагүй явж ирсэн бөгөөд ирээдүйд урсгал зардлаа даахгүй болсноор төсвийн бодлогын орон зай хумигдаж байгааг мэргэжилтнүүд анхааруулж байна. 2026 оны төсвийн орлогын бүтцийн хувьд мөн л уурхайн салбараас хэт хамааралтай байх төлөвтэй байгаа бөгөөд нүүрс, зэс зэрэг түүхий эдийн үнийн хэлбэлзлээс шалтгаалан төсвийн орлого эрсдэлд орох магадлалтай байна.

Судлаачдын зүгээс онцолж байгаагаар, төсвийн бодлого нь урт хугацаанд тогтвортой, хөрөнгө оруулалтын үр ашгийг дээдэлсэн, олон нийтийн оролцоотой байх нь ирээдүйд эдийн засгийн аюулгүй байдлыг хангах гол түлхүүр юм.