Засгийн газрын тэргүүн эдийн засгийн аюулгүй байдлаа хангах, эмзэг байдлаа бууруулахын тулд эдийн засгийн бүтцийн өөрчлөлт хийх шаардлагатайг онцолжээ. Тэрбээр төсвийн хүрээний мэдэгдэлд орлого, зарлага, өрийн тэнцвэрийг сайжруулах, иргэн, аж ахуйн нэгжүүдийг дэмжих бодлого баримтална гэдгийг дурдсан байна.

2025 оны эхний улиралд эдийн засгийн өсөлт 2.4%-д буурсан ч хагас жилийн дүнгээр 5.6%-д хүрч сэргэсэн байна. Үүнд ХАА-н салбарын 35%-ийн өсөлт гол дэмжлэг болсон гэж Засгийн газрын тэргүүн мэдээлэв. Эдийн засгийн өсөлтийг тогтвортой 6%-аас дээш түвшинд хадгалах зорилтын хүрээнд 2027 онд 6.3%, 2028 онд 6.5%-д хүргэхээр тооцжээ. Дунд хугацаанд эдийн засгийн өсөлтийг дэмжих гол салбар нь хүнд аж үйлдвэрийн салбар байх юм.

Засгийн газрын боловсруулсан төсвийн бодлогын баримт бичгүүдийн төслөөс үзвэл 2026 онд төсвийн орлогыг 31.6 их наяд төгрөг, зарлагыг 31.1 их наяд төгрөг байхаар тооцжээ. Төсвийн бодлогын гол чиглэл нь төсвийн хэт тэлэлтийг хязгаарлах, урсгал зардлыг нэмэгдүүлэхгүй байх, төрийн оролцоог багасгаж хувийн хэвшилд боломж олгох замаар эдийн засгийн өсөлтийг хангах юм.

Улсын төсвийн бодлогын баримт бичгийн төслийн хэлэлцүүлгийг УИХ-д үргэлжлүүлэхээр төлөвлөсөн бөгөөд АН-ын бүлэг түр завсарлага аваад байна. Хэлэлцүүлэг ирэх лхагва гарагт үргэлжлэх юм.