Дорноговь аймгийн ХХААГ-аас жил бүр уламжлал болгон зохион байгуулдаг “Намрын ногоон өдрүүд”-2025 үзэсгэлэн худалдаа өнөөдөр эхэллээ. Энэ удаагийн арга хэмжээнд 14 сумын 120 гаруй иргэн, аж ахуйн нэгж, хоршоо, нөхөрлөл болон төр, банк, санхүүгийн байгууллагууд оролцож, бараа бүтээгдэхүүн, ажил үйлчилгээ болон уламжлалт гар урлал, хүнсний бүтээгдэхүүнээ хэрэглэгчдэд хүргэж байна.

Өнгөрсөн жилийн таатай цаг агаарын нөхцөл, хур борооны арвин зунаас шалтгаалан малчид малын гаралтай түүхий эд болон ааруул, өрөм, тараг, шар тос, ингэний хоормог зэрэг олон нэр төрлийн бүтээгдэхүүн боловсруулж хэрэглэгчдэд өргөн сонголттойгоор санал болгожээ. Үнэ ханшийн хувьд нэг килограмм ааруул 30-40 мянган төгрөг, хагас килограмм шар тос 35 мянга, монгол нэрмэл 10 мянга, нэг килограмм тарвас 5000 төгрөгөөр худалдаалагдаж байна.

Энэ жилийн онцлог нь үйлдвэрлэгчид бүтээгдэхүүний сав баглаа боодол, дизайндаа анхаарч, нэр төрлийг нэмэгдүүлснээр хэрэглэгчдэд илүү өргөн сонголт бий болгож буйд оршиж байна. Үзэсгэлэн худалдаа хоёр өдөр үргэлжлэх бөгөөд орон нутгийн үйлдвэрлэл, үйлчилгээний хөгжилд чухал ач холбогдолтой гэж зохион байгуулагчид онцоллоо.