Гадил жимс нь дэлхийн хамгийн их хэрэглэгддэг, тэжээллэг чанартай жимс бөгөөд супер маркетуудын зайлшгүй бүтээгдэхүүн болсон. Гэвч уур амьсгалын өөрчлөлтөөс үүдэн ойрын жилүүдэд гадил жимсний хомсдол нүүрлэх аюултай гэж Time сэтгүүл мэдээлжээ.

Дулаарал болон чийгшил нэмэгдсэнээр хөдөө аж ахуйн олон ургамалд өвчлөл газар авч байгаа ба гадил жимсэнд хамгийн аюултайд тооцогдох Black Sigatoka, Tropical Race 4 хэмээх хоёр өвчин Колумби, Перу зэрэг гол тариалалтын бүсүүдэд эрчимтэй тархаж байна. Хэрэв ойрын 10-20 жилд энэ асуудлыг шийдвэрлэхгүй бол жимсний үйлдвэрлэлд сүйрлийн нөлөө үзүүлэхээр байгаа аж.

Гадил жимс нь дэлхийн дөрөв дэх хүнсний ургамал бөгөөд 400 сая гаруй хүний өдөр тутмын илчлэгийн 15-27 хувийг хангадаг. Түүнчлэн дэлхийн гадилын үйлдвэрлэлд сая орчим хүн ажилладаг тул хомсдол нь тэдний амьдралд шууд нөлөөлөх магадлалтай. Латин Америк болон Карибын бүсийн тариалангийн талбайн хэмжээ аль хэдийн 60 хувиар багасах хандлагатай болсон бөгөөд эдгээр бүс дэлхийн гадилын экспортийн 80 хувийг дангаараа хангаж байна. Судалгаагаар гадил жимснээс гадна буурцагт ургамал, эрдэнэ шош, цагаан будаа, улаан буудайн нийлүүлэлт ч мөн адил эрсдэлд орсон гэжээ. Хүнсний хомсдол нь зөвхөн дэлгүүрийн лангуу хоосрох бус, хамгийн түрүүнд үнэ огцом өсөхийг илэрхийлнэ.

Эх сурвалж: Time, OfficeLife.