Ерөнхий сайд Г.Занданшатар төрийн өмчийн компани, үйлдвэрийн газруудын засаглалыг сайжруулах чиглэлээр өгсөн албан даалгаврын биелэлттэй танилцах хүрээнд өчигдөр “Эрдэнэс Монгол” нэгдэл болон харьяа компаниудын удирдлагуудтай уулзлаа.

“Эрдэнэс Монгол” нэгдлийн гүйцэтгэх захирал С.Наранцогт өөрчлөлт, шинэчлэл, орлогоо нэмэгдүүлж зардлаа бууруулах гурван үе шаттай төлөвлөгөөг танилцуулсан байна. “Эрдэнэт үйлдвэр” 208 тэрбум, бусад компаниуд 95 тэрбум төгрөгөөр борлуулалтын орлогоо давуулан биелүүлэхээр ажиллаж байгаа бол “Шивээ-Овоо”, “Багануур” компанийн борлуулалт 32 тэрбум төгрөгөөр буурчээ. Мөн “Эрдэнэс Тавантолгой” 199 тэрбум, “Эрдэнэт үйлдвэр” 320 тэрбум, бусад компани 36 тэрбум төгрөгийн хөрөнгө оруулалтаа хойшлуулсан байна. Үүнээс гадна “Эрдэнэс Тавантолгой” үйл ажиллагааны зардлаа 1.3 их наяд, бусад компани 45 тэрбум төгрөгөөр хэмнэх тооцоо гаргасан байна.

Ерөнхий сайд уулзалтын үеэр төрийн өмчийн компаниуд данхар бүтэцтэй, бүтээмж муутай байгаа нь олон нийтийн шүүмжлэлийн гол сэдэв болсон гэдгийг онцолж, иргэдийн саналыг бодлогын шийдвэрт тусган ажиллахыг мэдэгдэв. 2026 оны улсын төсвийн төсөлд санал өгсөн 188 мянган иргэний 38 мянга нь төрийн өмчийн компаниудыг татан буулгах, бүтцийг цомхотгох шаардлагатай гэсэн байр суурийг илэрхийлжээ.

Тэрбээр “Эрдэнэс Монгол” нэгдэл дөрвөн их наяд төгрөгийн үр ашиг гаргах боломжтой гэж үзэж, энэ онд орлого нэмэгдүүлэх төлөвлөгөөг уг хэмжээнээс бууруулахгүй байхыг үүрэг болголоо. Мөн ирэх жил экспортын хэмжээг өсгөж, улсын төсөвт төвлөрүүлэх татвар, хураамжийг нэмэгдүүлэн Үндэсний баялгийн санг арвижуулах ёстойг сануулав. Үүнтэй зэрэгцэн боловсруулах үйлдвэр болон худалдан авах ажиллагааны нэгдсэн төлөвлөлт, удирдлагатай байх шаардлагыг ч онцоллоо.

Эх сурвалж: Засгийн газрын Хэвлэл мэдээлэл