Гашуунсухайт–Ганцмодын хил дамнасан төмөр замын бүтээн байгуулалтын ажил төлөвлөгөөний дагуу үргэлжилж байна.

Барилга угсралтын дэд ажлууд ахицтай урагшилж, байгаль орчны стандарт, хяналт сайжирсан бөгөөд ус, хог, бохирыг шийдэх алхмууд хийж байна. Тухайлбал, пүүний барилга угсралтыг дуусгаж, суурийг ухан, хөрсний нягтаршуулалт, бетон цутгалт, хэв хашмал угсралтыг гүйцэтгэжээ. Хаалттай бүсийн хашааг барьж байгаа. Шонгийн угсралт 41 хувьд хүрч (1,700 шон), суурийн нүхний бетон дүүргэлт 82.9 (864.25 м³), торон хашаа 40.4 (5,058 м²) хувийн гүйцэтгэлтэй байна.

Түүнчлэн, Өмнөговь аймгийн Байгаль орчны газраас гүйцэтгэгч талд ажилчдын байрны хажууд бохир ус цэвэрлэх байгууламжийг яаралтай байгуулах зөвлөмж хүргүүлсний дагуу түр жорлон, ундны болон хэрэглээний усны хангамжийг шийдэж байгаа аж. Мөн, “Хан дизель”, “Хот тохижилт” ОНӨААТҮ-тэй бохир ус зайлуулах, хог тээвэрлэх үйлчилгээний талаар ярилцаж, гэрээний төслийг танилцуулсан байна. Ханбогд сумын байгаль орчны байцаагчид карьер, худаг усны ашиглалттай танилцан, Галба–Өөш долоодын говийн сав газрын 5 худгийн ус ашиглах гэрээ байгуулахаар ажиллаж байгааг “Тавантолгой Төмөр Зам” ХХК мэдээлжээ.

Гашуунсухайт–Ганцмодын хил дамнасан төмөр зам нь 32.6 км урттай, 1-р зэрэглэлийн, 1520 мм өргөн, 1435 мм нарийн царигийн хос замтай, жилд 40 сая тонн ачаа тээвэрлэх хүчин чадалтай байна. Үүнээс 19.5 км нь гол төмөр зам, үлдсэн хэсэгт 8–31 м өндөр дан, хос гүүрэн байгууламж, хил орчмын хяналтын цогцолбор, технологийн барилга байгууламж, дэд бүтэц багтаж байгаа. Хоёр жилийн хугацаанд хэрэгжих төслийн нийт төсөвт өртөг 902 тэрбум төгрөг бөгөөд УИХ-ын тогтоолоор санхүүжилтийг “Эрдэнэс Тавантолгой” ХК хариуцах юм.