Нийслэлийнхэн төдийгүй Монгол даяараа “Митайм Интернэшнл” Камбожийн хаант улсаас мах, гурилтайгаа гүйгээд ирэх үү эсвэл Шунхлай маань гэртээ байгаа давсаараа цуйван сэгсрэх үү гэдгийг харна. Хэн нь ч байсан Улаанбаатар хот тогоогоо угаачихаад хүлээж буй. Х.Нямбаатар дарга маань 660 сая ам.долларын “цуйван”-аар дайлахаар иргэдээ жагсаачихсан барианы газар өндөлзөж харагдана.

Бид Социализмын материал техникийн бааз байгуулж байхдаа ирээдүйд эрчим хүч дутагдахыг тооцоод ДЦС5-ыг Зөвлөлт нөхдөөрөө бариулахаар 1988 онд Улаанбаатарын зүүн захад шав тавьсан. Гэтэл 1991 онд Зөвлөлт Холбоот Улс гэдэг субъект социализмтой хамт нурж унаад 40 шахам жил өнгөрчээ. Эрчим хүчний төсөл бол “Маргааш ирж тоглоё” гээд хүүхэд байхдаа орхиод харьдаг элсэн цамхаг биш. XX, XXI зуун дамнуулан ДЦС5 барихаар Улаанбаатарын зүүн этгээдэд хэд зүтгээд “газрын асуудал”-тай тулгарсаар өдийг хүрлээ. 2013 оны наймдугаар сард гүйцэтгэгч сонгон шалгаруулахад Францын “Жи ди Эф Суэз”, Японы “Сожитц корпораци”, БНСУ-ын “Поско энержи”, Монголын “Ньюком”-оос бүрдсэн түншлэл 1.5 тэрбум ам.доллароор барихаар тодорсон ч мөнөөх газрын асуудал дээр гацсан юм.

Хотын дарга Х.Нямбаатар харин “ДЦС2-ын хашаанд шахаад барья” гэдэг санаа гаргасан. Одоо 660 сая ам.долларын өртөгтэй ДЦС5-ыг барих этгээдийг “хайж” байна. Гэхдээ энэ тендер биш. Тендер гэдэг “Хэн хямдхан хийх вэ” гэдэг тоглоом. Энэ бол “Хэн 660 сая ам.доллар халааснаасаа гаргаад бас барих вэ” гэдэг томчуудын лиги. Нийслэл “Бид 20 хувийг нь цувуулаад гаргая, та нар эхлээд 80 хувийг нь гарга” гэх утга бүхий урилга тараажээ. 

Зарим нөхөд “Ямар өндөр үнэтэй тендер вэ” гэж хашгирч байна. Хөөе, бид өнөөдөр хүндэтгэлтэйеэ мэхийн ёсолж байгаад бусдаар мөнгийг нь гаргуулаад зогсохгүй бас ДЦС5-аа бариулъя гээд байна. Зүйрлэвэл “Манайд давс байна, чи мах, гурилаа аваад ир, хоёулаа цуйван хийж идье” гэсэн үг. “Цуйван хийх” шалгаруулалтад хүний өөрийн хоёр этгээд оржээ. Нэг нь Шунхлай Холдинг буюу АПУ, Спирт Бал Бурам, Скайтелын ард байдаг монголчуудын сайн мэдэх компани. Нөгөө нь Камбожид бүртгэлтэй “Митайм Интернэшнл” хэмээх олон улсын тоглогч. Хаанаас ч юм Хятадын компани гэдэг хоч зүүгээд байгаа бололтой. Хятад л бол жигшдэг монголчуудын сэтгэлийн оёгт таарсан, хэзээ ч хуучрахгүй арга. 

Камбожийн хаант улсад бүртгэлтэй олон улсын тоглогчийг манай эрчим хүчнийхэн “Эд нар тийм сайн цуйван хийж чадахгүй” гээд хошуугаа унжуулж суугаа гэнэ. “Митайм Интернэшнл”-ийн Завханы Тосонцэнгэлд барьсан “Тосон” 22 МВт-ын ДЦС Баруун бүсийн эрчим хүчний нэгдсэн сүлжээнд холбогдчихсон ачааллаа үрээд нуугиж буй билээ. Сэлэнгийн Сүхбаатарт барьж байгаа 70МВт-ын ДЦС-аа энэ ондоо Төвийн эрчим хүчний нэгдсэн системд залгах төлөвлөгөөтэй яваа. 

Харин Монголын зам, барилгын тендерийг алгасдаггүй Хятадын компаниуд яагаад шалгаруулалтад орсонгүй вэ? Ши Жиньпин дарга “Гадаадад нүүрсний станцын төсөлд мөнгө цацахгүй” гээд хориг тавьчихсан. МАК компани Harbin Electric International гэдэг Хятадын компанитай зөвхөн зураг төсөл хийлгэх гэрээ хийсэн. “Чи жороо өгчих, бид цуйван хийнэ” гэсэн шиг. 

Нийслэлийнхэн төдийгүй Монгол даяараа “Митайм Интернэшнл” Камбожийн хаант улсаас мах, гурилтайгаа гүйгээд ирэх үү эсвэл Шунхлай маань гэртээ байгаа давсаараа цуйван сэгсрэх үү гэдгийг харна. Хэн нь ч байсан Улаанбаатар хот тогоогоо угаачихаад хүлээж буй. Х.Нямбаатар дарга маань 660 сая ам.долларын “цуйван”-аар дайлахаар иргэдээ жагсаачихсан барианы газар өндөлзөж харагдана.

Батбаяр  /Baabar.mn/