"Дулааны гуравдугаар цахилгаан станц" ТӨХК дээр дахин дэлбэрэлт болсон гэх мэдээлэлтэй холбогдуулан Эрчим хүчний яам, станцын удирдлагууд өнөөдөр албан ёсны мэдэгдэл хийлээ.

Эрчим хүчний яамны Төрийн нарийн бичгийн дарга Н.Тавинбэхийн хэлснээр, зургаадугаар сарын 2-нд турбин генератор дээр гарсан гэмтэл нь гал түймрийн улмаас тоног төхөөрөмж болон барилга байгууламжид хохирол учруулсан бөгөөд тус обьектуудыг дахин ашиглах боломжгүй болсон байна.

Засгийн газар уг осолтой холбогдуулан 47 хоногийн өмнө онцгой дэглэм тогтоож, сэргээн босголтын ажлыг шуурхай эхлүүлжээ. Төлөвлөгөөний дагуу хийгдэх дөрвөн ажлын хоёр нь энэ онд багтан дуусах бөгөөд одоогийн байдлаар амжилттай хэрэгжиж байгаа хэмээн мэдээлэв.

Н.Тавинбэх мөн дараах тайлбарыг өглөө:

• Сэргээн босголтын ажил идэвхтэй өрнөж байгаа энэ үед станцын дотоодоос буруу, хэт сэвсэн мэдээлэл цацагдаж байгааг зохисгүй явдал гэж үзэж буйгаа илэрхийлсэн.

• Наймдугаар сарын 1-нд гарсан гэмтлийг “анх удаагийн тохиолдол биш” гэж тодотгож, нүүр тулсан өвлийн ачааллын үед ийм гэмтэл 15 удаа гарч байсан бөгөөд тухайн бүрд амжилттай засварласан гэдгийг онцолсон.

• Гэмтсэн зуух ашиглалтад ороод 50 жил болсон бөгөөд энэ удаагийн гэмтлийг засах ажил долоо хоног үргэлжлэх төлөвтэй байна.

• 1,004 хүнтэй, 198 мегаваттын хүчин чадал бүхий энэхүү станц нь 60 жилийн турш ажиллаж буй стратегийн чухал эх үүсвэр бөгөөд технологийн хуучралтай холбоотойгоор зарим саатал, гэмтэл гарч байгааг нуухгүй гэв.

Мөн Засгийн газраас томилогдсон БЭТ-ийн баг нь бүтцийн оновчлол, худалдан авалтын зөрчил арилгах чиглэлд хяналтыг чангатгаж, хатуу арга хэмжээ авч буй нь зарим хүмүүсийн эсэргүүцэлтэй тулгарч байгааг дурдав. Ийм үед гарч буй хэвийн саатлыг хэт дэвэргэж, нийгэмд сөрөг ойлголт төрүүлж буйг шүүмжилсэн байна.

Эх сурвалж: Эрчим хүчний яам, ДЦС-3 ТӨХК