Нийслэлийн ИТХ-ын дарга А.Баяр, Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин нар Азийн Хөгжлийн Банкны Эрчим хүчний салбарын бүтээгдэхүүн хөгжүүлэлтийн газрын захирал Синди Киснерос-Тиангко тэргүүтэй албаны төлөөлөгчдийг хүлээн авч уулзлаа. Энэ үеэр Улаанбаатар хотын гэр хорооллын бүсэд сэргээгдэх эрчим хүч, тэр дундаа нарны эрчим хүчийг нэвтрүүлэх чиглэлээр талууд санал солилцсон байна.

НИТХ-ын дарга А.Баяр уулзалтын эхэнд Азийн Хөгжлийн Банк Монгол Улсын эрчим хүчний салбарын шинэчлэлд үнэтэй хувь нэмэр оруулж ирснийг онцлон талархал илэрхийлж, гэр хорооллын иргэдийн амьдралын чанарыг сайжруулах, төвлөрсөн эрчим хүчний системээс хамааралгүй, тогтвортой, цэвэр эх үүсвэрт суурилсан шийдэл бол нарны эрчим хүч хэмээн үзэж буйгаа илэрхийлэв. Тиймээс энэхүү шилжилтийг нийслэлийн зүгээс бодлогын түвшинд бүх талаар дэмжин ажиллахаа мэдэгдлээ.

НЗД-ын орлогч А.Амартүвшин агаарын бохирдлыг бууруулах хүрээнд нийслэлд хэрэгжүүлж буй бодлого, арга хэмжээний талаар танилцуулахдаа, 2025 онд багтаан 51 мянган айлыг дулаалах, цахилгаан болон хийн халаалт руу шилжүүлэх ажлыг эхлүүлж байгааг онцлов. Түүнчлэн гал түлдэггүй, цахилгаан болон хийн халаагуур ашиглаж байгаа өрхүүдэд хэрэглээний төлбөрийн урамшуулал үзүүлэх бодлого хэрэгжүүлж эхэлжээ. Ирэх жилүүдэд нарны болон ус төрөгчийн эрчим хүчийг өргөн хүрээнд ашиглах, орон сууцжуулах төслүүдийг давхар хэрэгжүүлэх зорилготой байгааг ч хэллээ.

Нийслэлийн хувьд 2028 он гэхэд 1000 айлыг нарны сэргээгдэх эрчим хүчний системд холбохоор төлөвлөсөн бөгөөд өнгөрсөн онд 47 айлыг, энэ онд Чингэлтэй дүүргийн 200 айлыг холбохоор ажиллаж байна. Энэ нь нийслэлд тулгамдаж буй агаарын бохирдол, эрчим хүчний хангамжийн доголдлыг шийдвэрлэхэд чухал алхам гэж хотын удирдлагууд үзэж байна.

Азийн Хөгжлийн Банкны төлөөлөгчид Монгол Улсад сэргээгдэх эрчим хүчийг, ялангуяа нар, салхины эх үүсвэрийг ашиглах асар их боломж байгааг тэмдэглэж, гэр хорооллын бүсэд өвлийн нөхцөлд тохирсон технологи, инженерийн шийдэл боловсруулах техник туслалцааны төсөл хэрэгжүүлэх санал дэвшүүлэв. Ингэснээр Монгол Улс дотоодын нөөцөд тулгуурласан, хараат бус эрчим хүчний системд шилжих замыг илүү бодитой болгох боломжтой гэж үзэж байгаагаа илэрхийллээ.

Талуудын хэлэлцээний үр дүнд, дараагийн уулзалтаар Улаанбаатар хотын гэр хорооллыг нүүрснээс нарны эрчим хүч рүү үе шаттай шилжүүлэх төслийн гэрээнд гарын үсэг зурахаар тохиролцсон байна. Энэхүү хамтын ажиллагаа нь нийслэлийн ногоон хөгжил, эрчим хүчний аюулгүй байдалд урт хугацаанд эерэг үр нөлөө үзүүлнэ хэмээн талууд үзэж байна.

Эх сурвалж: Нийслэлийн ИТХ, Нийслэлийн ЗДТГ