Нийслэлийн хүн амын хүнсний хэрэгцээг тогтвортой хангах, махны хангамжийг сайжруулах, үнийн хөөрөлтийг тогтворжуулах зорилгоор 2025 оны зургаадугаар сарын 21-27-ны өдрүүдэд Улаанбаатар хотын 8 дүүргийн 36 байршилд нөөцийн махны өргөтгөсөн худалдаа зохион байгуулж байна.

Тус худалдаагаар хонины махыг гулуузаар 1 кг нь 10,000 төгрөг, үхрийн махыг 1 кг нь 13,000 төгрөгөөр тус тус борлуулж буй нь зах зээлийн үнээс харьцангуй хямд үнэ юм.

Худалдааны байршлуудыг дүүрэг тус бүрээр иргэдэд ойр байлгах, хүндрэл чирэгдэлгүй хүрэх нөхцөл бүрдүүлэх үүднээс дараах байдлаар зохион байгуулжээ:

• Баянзүрх дүүрэг – 7 байршилд

• Сонгинохайрхан дүүрэг – 7 байршилд

• Хан-Уул дүүрэг – 5 байршилд

• Баянгол дүүрэг – 4 байршилд

• Сүхбаатар дүүрэг – 4 байршилд

• Чингэлтэй дүүрэг – 3 байршилд

• Багахангай, Налайх дүүргүүд – тус бүр 3 байршилд

Худалдаа явагдаж буй цэгүүд нь хүнсний дэлгүүр, хоршооны төв, зах, сургууль, хүн ам олноор төвлөрсөн байршлуудад байрлаж байгаа тул иргэд гэртээ ойр цэгүүдээр үйлчлүүлэх боломжтой юм.

Худалдагдаж буй махыг хөдөө орон нутгаас нийслэлийн мах хадгалах нөөцийн агуулахуудад оруулан, мэргэжлийн байгууллагын хяналтад чанар, ариун цэврийн шаардлагын дагуу хадгалж, худалдаанд гаргаж буйг зохион байгуулагчид онцолж байна. Мөн худалдаанд гарч буй мах нь Мал эмнэлгийн гэрчилгээтэй, халдваргүй бүс нутгаас гаралтай гэдгийг холбогдох албаныхан мэдээлсэн.

Иргэдэд зориулан худалдааны байршил тус бүрт тайлбар мэдээллийг байршуулсан бөгөөд хүнсээ төлөвлөж, тодорхой байршлуудад очиж үйлчлүүлэхийг уриалж байна. Энэ нь нөөцийн махыг зорилтот бүлэгт тэгш хүртээмжтэй, хүрэлцээтэй хүргэхэд чухал ач холбогдолтой юм.

Энэхүү арга хэмжээ нь Нийслэлийн Засаг даргын Тамгын газар, Нийслэлийн Хүнс, хөдөө аж ахуйн газар, нийслэлийн дүүргүүдийн Хүнс, худалдаа, үйлчилгээний хэлтэс, худалдаа эрхлэгчид болон агуулахын операторуудын хамтран хэрэгжүүлж буй бодит ажил юм.

Эх сурвалж: Нийслэлийн Хүнс, хөдөө аж ахуйн газар, НЗДТГ