Монгол Улсын 2024 оны төсвийн гүйцэтгэлийг батлах тухай УИХ-ын тогтоолын төслийг энэ сарын 19-нд Сангийн сайд Б.Жавхлан УИХ-ын дарга Д.Амарбаясгаланд өргөн мэдүүлжээ.

Төсвийн тухай хуулийн дагуу УИХ нь хаврын чуулганаар улсын төсвийн гүйцэтгэлийг хэлэлцэн батлах үүрэгтэй. Энэ хүрээнд боловсруулсан тайлангийн дагуу 2024 онд улсын төсвийн нийт орлого ба тусламжийг 20 их наяд 652.3 тэрбум төгрөг-өөр төлөвлөснөөс 20 их наяд 533.0 тэрбум төгрөг-ийг төвлөрүүлж, 99.4 хувийн гүйцэтгэл үзүүлсэн байна.

Түүнчлэн Төсвийн тогтворжуулалтын санд 478.6 тэрбум төгрөг төвлөрүүлэхээр төлөвлөснөөс 443.9 тэрбум төгрөгийг төвлөрүүлжээ. Энэ нь төлөвлөсөн дүнгийн 92.7 хувьтай тэнцэж байна.

Сангийн сайдын танилцуулгад дурдсанаар, улсын төсвийн тэнцвэржүүлсэн орлого ба тусламжийн нийт дүн нь 20 их наяд 89.1 тэрбум төгрөгт хүрсэн нь өмнөх оны гүйцэтгэлээс 24.9 хувиар өссөн үзүүлэлт болж байна.

Харин нийт зарлага ба цэвэр зээлийн дүн нь 21 их наяд 372.4 тэрбум төгрөг, буюу 94.2 хувийн гүйцэтгэлтэй гарчээ.

Энэхүү төсвийн гүйцэтгэлийн тайлан нь Төсвийн тухай хуулийн дагуу УИХ-аар хэлэлцэгдэж, батлагдах юм.

Эх сурвалж: УИХ-ын Хэвлэл мэдээллийн газар.