Гэр бүл, хөдөлмөр, нийгмийн хамгааллын яам (ГХНХЯ) болон Монгол дахь НҮБ-ын Хүн амын Сан хамтран "Эрх тэгш байдал, тэгш оролцоог эрчимжүүлэх нь: Монгол Улсын үе хоорондын ба жендэрт тулгуурласан эдийн засгийн асуудал" сэдвээр хэлэлцүүлэг зохион байгуулжээ.

Хэлэлцүүлгийн үеэр Монгол Улсын хүн амын бүтцэд томоохон өөрчлөлт орж байгааг онцолсон байна. Тухайлбал, хөдөлмөрийн насны хүн ам өсөж, улс оронд хүн ам зүйн ногдол ашиг буюу демографийн цонхийг ашиглах урьд өмнө байгаагүй боломж бий болсон тухай дурджээ. Гэвч энэ байдал удаан үргэлжлэхгүй бөгөөд 2050 онд таван хүн тутмын нэг нь өндөр настан болох судалгаа гарсан нь томоохон сорилт болохыг харуулсан юм.

Мөн хүн амын бүтцэд өөрчлөлт орж байгаатай холбоотойгоор үндэсний шилжүүлгийн дансыг ашиглах болсон байна. Энэхүү данс нь хүн амын бүтцийн өөрчлөлттэй холбоотой стратегийн хөрөнгө оруулалт хийхэд чиглэсэн, нотолгоонд тулгуурласан шийдвэр гаргахад бодит мэдээлэл өгдөг чухал аргачлал юм.

Олон улсын туршлагаас дурдахад, Тайланд улс нийгмийн халамжийн тогтолцоогоо оновчтой болгоход анхаарч байхад, Филиппин улс насжилтын стратегийг тодорхой болгоход үндэсний шилжүүлгийн дансыг ашиглаж байна. Монгол Улсад ч бодлого, нотолгоонд суурилсан бодит мэдээлэл зайлшгүй хэрэгтэй байгаа ажээ.