Хятад улсын төв хэсэгт байрлах, 20 гаруй сая хүн амтай Ухань хот нь өнөөдөр тус улсын бизнес, эдийн засаг, аялал жуулчлалын голлох төвүүдийн нэг болон хөгжиж байна. Жилээс жилд гадаад, дотоодын хөрөнгө оруулагчид болон аялагчдын тоо нэмэгдэж буй нь Уханийн эдийн засагт томоохон түлхэц өгчээ. Үүний зэрэгцээ Хятадын төрийн өмчит байгууллагууд Уханьд “Хил дамнасан цахим худалдаа, аж үйлдвэрийн парк” байгуулж, олон улсын ачаа тээврийн зориулалттай онгоцны буудал болон цахим худалдааны цогц бүтээн байгуулалтыг үе шаттайгаар хэрэгжүүлж байна.

Тус бүтээн байгуулалтын хүрээнд дэлхийн улс орноос ирсэн бараа бүтээгдэхүүнийг хүлээн авч, дотоод болон гадаад зах зээл рүү түгээхээс гадна TikTok платформоор дамжуулан цахим худалдаа эрхлэх, аж ахуйн нэгжүүдэд зориулсан сургалт, мэдээллийн үйл ажиллагаа ч зохион байгуулж байна.

2023 онд ашиглалтад орсон “Хуахү” хэмээх ачаа тээврийн нисэх онгоцны буудал нь 17 зам шугамтай бөгөөд цагт 280 мянган ширхэг ачааг ангилан, нислэгт бэлэн болгох хүчин чадалтай. Дотоодын 58, олон улсын 42 чиглэлд нислэг үйлдэхээр төлөвлөсөн тус буудал шөнийн 00:00–02:00 цагийн хооронд хамгийн идэвхтэй ачаа тээвэрлэдэг бөгөөд нэг шөнө хамгийн ихдээ 90 нислэг хүлээн авах боломжтой аж.

Онгоцны буудлын дэргэд хил, татвар, тээврийн хяналтын хэсгүүдийг байршуулсан бөгөөд бизнесийн байгууллагын үйлчилгээг ч нэг дор төвлөрүүлжээ. Барилгын бүтээн байгуулалт үргэлжилж байгаа бөгөөд 2050 он гэхэд өдөрт 200 сая ширхэг хэмжээний ачаа хүлээн авч, илгээх хүчин чадалд хүрэх зорилготой байна. Мөн агаар, төмөр зам, усан замын тээврийг нэгтгэсэн тээврийн иж бүрэн зангилаа байгуулах төлөвлөгөөтэй байна.

Цахим худалдааг дэмжих үүднээс Хятадын Засгийн газар холбогдох дүрэм журам гаргаж, компанид зориулсан сургалт, дэмжлэгийг өргөн хүрээнд үзүүлж эхэлсэн нь олон аж ахуйн нэгж амжилт гаргахад чухал нөлөө үзүүлжээ. Үүний дүнд TikTok зэрэг платформоор бараа бүтээгдэхүүнээ борлуулж буй аж ахуйн нэгжүүдийн тоо эрс нэмэгдэж байна.