Үндэсний статистикийн хорооноос танилцуулсан 2025 оны тавдугаар сарын орон сууцны үнийн индексийн тайланд дурдсанаар, орон сууцны нийт үнэ өнгөрсөн оны мөн үетэй харьцуулахад 14.3 хувиар, харин өмнөх сараас 1 хувиар өссөн үзүүлэлттэй байна. Энэ нь сүүлийн нэг жилийн хугацаанд орон сууцны үнэ тогтвортой өсөлттэй байсныг илтгэж байна.

Шинэ орон сууцны үнэ өнгөрсөн оны мөн үеэс 13 хувиар, өмнөх сараас 1 хувиар өссөн бол хуучин орон сууцны үнэ 15.3 хувиар, өмнөх сараас 1.1 хувиар өссөн байна. Шинэ орон сууцны 1 метр квадрат талбайн дундаж үнэ 4.55 сая төгрөгт хүрсэн бөгөөд дүүргүүдийн дундаас хамгийн өндөр үнэ Сүхбаатар дүүрэгт бүртгэгдэж, нэг метр квадрат нь 5.49 сая төгрөг болжээ. Энэ нь өмнөх оныхоос 37.3 хувиар буюу 1.49 сая төгрөгөөр өссөн дүн юм.

Шинэ орон сууцны үнийн хувьд хамгийн бага өсөлттэй дүүрэг нь Баянгол байв. Тус дүүрэгт үнэ 3 хувиар буюу 124.9 мянган төгрөгөөр өссөн байна.

Хуучин орон сууцны дундаж үнэ 4.57 сая төгрөг болж, мөн Сүхбаатар дүүрэгт хамгийн өндөр буюу 5.57 сая төгрөгт хүрсэн байна. Харин үнийн өсөлт хамгийн их байсан дүүрэг нь Чингэлтэй бөгөөд хуучин орон сууцны үнэ энд 22.7 хувиар буюу 998 мянган төгрөгөөр нэмэгджээ. Үүний эсрэгээр, хамгийн бага өсөлттэй дүүрэг нь Сонгинохайрхан бөгөөд тус дүүрэгт үнэ 11.4 хувиар буюу 311.1 мянган төгрөгөөр өссөн байна.

Орон сууцны нийт үнэ ийнхүү огцом өсч буй нь иргэдийн худалдан авах чадварт тодорхой дарамт учруулж болзошгүйг шинжээчид онцолж байна.