Архангай аймгийн Хотонт, Цэнхэр сумын нийт 3000 га талбайд ойн хөнөөлт шавжтай тэмцэх ажлыг “Гранд форест” ХХК улсын төсвийн хөрөнгөөр гүйцэтгэж эхэлжээ. Энэхүү ажил зургадугаар сарын 13-наас албан ёсоор эхэлсэн бөгөөд дрон технологи ашиглан ойн сангийн эрүүл мэндийг хамгаалах, хөнөөлт шавжийн тархалтыг хязгаарлах зорилготой юм.
Хотонт сумын Улаанчулуу, Орхон багийн Чулуун даваа, Шар булаг, Дөч, Хар овоо, Байшин булаг орчмын нийт 1600 орчим га ойн талбайд дрон ашиглан шавж устгалын ажлыг гүйцэтгэж байна. Үүний дараа Цэнхэр сумын Тамирын гол дагуух 1400 га навчит ойн бүсэд уг ажлыг үргэлжлүүлнэ. Эдгээр бүс нутгуудад ойн санд хохирол учруулж буй шавжны төрөл зүйл нэмэгдэж буй тул байгаль орчны хамгаалал, ой модны нөхөн сэргээлтэд чухал нөлөөтэй арга хэмжээ хэмээн үзэж байна.
Тэмцлийн ажлын явц, үр дүнд орон нутгийн Сум дундын ойн анги болон тухайн бүс нутгийг хариуцсан байгаль хамгаалагчид тогтмол хяналт тавьж байгаа бөгөөд үр дүнг мэргэжлийн түвшинд үнэлж, дараа дараагийн арга хэмжээний үндэслэл болгох аж.
Мөн устгалын бодис цацсан талбайд 14 хоногийн хугацаанд иргэдийг нэвтрэхгүй байх, аливаа үйл ажиллагаа явуулахгүй байхыг сануулж, байгаль хамгаалагчдаас өгсөн заавар, зөвлөмжийг чанд дагаж мөрдөхийг анхаарууллаа.
Эх сурвалж: Байгаль орчин, аялал жуулчлалын яам
Сэтгэгдэл (1)