“Метро ба газар доорх байгууламж – олон улсын туршлага” сэдэвт сургалт өчигдрөөс эхэлж, дэлхийн улс орнуудын инженер, эрдэмтэд туршлагаа хуваалцаж байна. Сургалтын хоёр дахь өдөр “Барилгын салбар дахь төр ба хувийн хэвшлийн түншлэл” сэдвээр олон улсын дугуй ширээний ярилцлага зохион байгуулагдаж, төр-хувийн хэвшлийн түншлэлийн (ТХХТ) бодлого, хэрэгжилтийн талаар өргөн хүрээнд хэлэлцэж байна.

Ярилцлагад Монгол Улсад хэрэгжих томоохон бүтээн байгуулалтын мега төслүүдийг үр дүнтэй хэрэгжүүлэхэд ТХХТ-ийн оролцоо ямар байх ёстой, гадаадын улс орнуудын жишээ, бодлого, эдийн засагт үзүүлсэн үр нөлөө зэрэг чухал сэдвүүдийг онцолжээ.

Сургалтын үеэр Герман, Япон, БНСУ, Тайванийн барилгын салбарын инженер, эрдэмтэд оролцож, метроны төлөвлөлт, инженерчлэлийн шийдэл, аюулгүй байдал, шинэ техник технологийн дэвшил, байгаль орчинд үзүүлэх нөлөөллийн талаарх илтгэл тавьсан байна. Эдгээр сэдвүүд нь Монголд метроны төслийг хэрэгжүүлэх бэлтгэл ажлын хүрээнд ихээхэн ач холбогдолтой гэж оролцогчид онцолжээ.

Уг үйл ажиллагаанд Монголын барилга, авто зам, дэд бүтцийн салбарын инженерүүд идэвхтэй оролцож байгаа бөгөөд олон улсын тэргүүн туршлагыг судлан, өөрсдийн бодлого, төлөвлөгөөнд тусгаж хэрэгжүүлэх боломжийг бүрдүүлж байгаагаараа онцлог юм.

Эх сурвалж: Барилгын хөгжлийн төв