Comex бирж дээр энэ даваа гарагт хийсэн оройн арилжаагаар 2025 оны зургаадугаар сард нийлүүлэх мөнгөний фьючерсийн үнэ 13 жилийн дараа анх удаа унци нь $37.027 долларт хүрч, 2.41 хувийн өсөлттэй арилжаалагдлаа. Энэ нь 2012 оны хоёрдугаар сарын 29-нөөс хойших хамгийн өндөр ханш болсон юм. Гэсэн ч өсөлт удааширч, дараагийн өдрийн арилжаанд мөнгөний үнэ унци нь $36.7 долларт тогтжээ.

Цаг хугацааны хувьд энэ өсөлт санхүүгийн зах зээл дээрх эрэлт, геополитикийн тодорхой бус байдал, мөнгөний хэрэгцээний өсөлттэй уялдаж байгаа нь анзаарагдаж байна. Мөнгө нь зөвхөн үнэт металл бус цахилгаан, нарны эрчим хүч зэрэг технологийн салбарт өргөн хэрэглэгддэг учир зах зээлийн мэдрэг хандлагад шууд нөлөөлдөг.

Нөгөө талаас, мягмар гарагт платин буюу цагаан алтны үнэ дөрвөн жилийн хамгийн өндөр өсөлтийг үзүүлж, 1.4 хувиар нэмэгдэн унци нь $1232 долларт хүрчээ. Ийн өссөн шалтгаан нь 2025 онд нэг сая унцийн нийлүүлэлтийн хомсдол үүснэ гэх хүлээлттэй холбоотой. Bloomberg-ийн мэдээлснээр энэхүү хомсдолын тухай мэдээлэл үнэт металлын үнийг түлхэж, хөрөнгө оруулагчдыг татах үндэслэл болж байна.

Цагаан алт нь автомашины бензин хөдөлгүүрийн каталик тогтворжуулагч, лабораторийн тоног төхөөрөмж, мөн үнэт эдлэл болон хөрөнгө оруулалтын хэрэгсэлд ашиглагддаг. Энэ онд цагаан алтны үнэ нийтдээ 32 хувиар өсөөд байгаа нь зах зээлд бууралт биш, харин хүлээлт давамгайлсан уур амьсгалыг илтгэж байна.

Эх сурвалж: Officelife.media, Bloomberg