Монголбанк, Швейцарын “Хариуцлагатай алтны холбоо” болон дэлхийд нэр хүндтэй “Аргор Хераиус” алт цэвэршүүлэх үйлдвэр хамтран ажиллах санамж бичиг байгууллаа. Энэ хамтын ажиллагааны хүрээнд Монгол Улсад үйл ажиллагаа явуулж буй жижиг, дунд алт олборлогчид болон бичил уурхай эрхлэгчдийн олборлосон алтыг олон улсын үнэт эдлэлийн зах зээлд түүхий эд байдлаар нийлүүлэх нөхцөл бүрдэх юм.
Энэхүү санаачилга нь Монголын алтны олборлолт, нийлүүлэлтийн сүлжээ ил тод, хариуцлагатай, найдвартай гэдгийг дэлхийн зах зээлд харуулахад чухал алхам болно. Үүнтэй уялдуулан алт тушаасан бичил уурхайчдад кг тутамд нь урамшуулал олгохоор төлөвлөсөн байна.
Төслийн эхний шатны ажил Булган аймагт хэрэгжих бөгөөд тус аймаг дахь Монголбанкны хэлтэс, Стандарт хэмжил зүйн газрын Үнэт металлын сорьцын хяналтын газрын сорьц тогтоох лабораторитой хамтран ажиллана. Энэ хүрээнд орон нутгийн бичил уурхайчдыг албан ёсны сүлжээнд нэгтгэх, олон улсын стандарт хангасан алт олборлолтыг дэмжих чиглэлээр сургалт, үнэлгээ, сорьц тогтоох зэрэг үйл ажиллагааг шат дараатайгаар зохион байгуулна.
Түүнчлэн Монголбанк нь өнгөрсөн онд “Дэлхийн алтны зөвлөл”-ийн хурлын үеэр Колумб, Эквадор, Филиппин зэрэг улсын Төв банкуудтай адил бичил уурхайгаас албан ёсоор алт худалдан авах, хариуцлагатай олборлолтыг дэмжих зорилготой “Лондоны зарчмууд” хэмээх олон улсын багц зарчмыг дэмжиж, нэгдсэн байна.
Энэхүү санаачилга нь бичил уурхайчдыг зөвшөөрөлтэй, хяналттай, нийгэмд хүлээн зөвшөөрөгдсөн олборлогч болгон хөгжүүлэх, цаашлаад Монголын алтны салбарыг олон улсын итгэлцэлтэй, урт хугацааны хөрөнгө оруулалт татахуйц салбар болгох зорилготой юм.
Эх сурвалж: Монголбанк, Responsible Gold Initiative, Argor-Heraeus.
Сэтгэгдэл (1)