Монгол Улсын Ерөнхийлөгчийн санаачилсан “Хүнсний хувьсгал” хөдөлгөөн болон Засгийн газрын “Атрын IV” аяны хүрээнд хөдөө аж ахуйн салбарыг дэмжих бодит ажлууд үр дүнтэй хэрэгжиж байна. Энэ хүрээнд “Хөдөө аж ахуйн корпораци” ТӨХХК нь газар тариалангийн үйлдвэрлэлийн үр ашгийг нэмэгдүүлэх, хөрсний үржил шимийг хамгаалах зорилгоор цогц стратеги, олон улсын шилдэг туршлагыг нутагшуулж эхэлжээ.

Тус корпораци нь ОХУ-ын хөдөө аж ахуйн салбарын тэргүүлэгч “Уралхим” компанийн Монгол дахь албан ёсны төлөөлөгч “Бест Вестерн Тех” ХХК-тай хамтран ажиллаж, 45 аж ахуйн нэгж, иргэдэд таван нэр төрлийн нийт 2,163.2 тонн өндөр агууламжтай бордоог хөнгөлөлттэй нөхцөлөөр нийлүүлсэн байна. Эдгээр бордоог 21,630 га талбайд хэрэглэснээр ургамлын ургалтын эрч сайжирч, хөврөлтийн жигд байдал нэмэгдэн, ургацын хэмжээ, чанар ахисан дүн гарчээ.

Мэргэжлийн байгууллагуудын үнэлгээгээр уг бордооны хэрэглээ нь зөвхөн нэг улиралд төдийгүй хөрсний урт хугацааны үржил шимд эерэг нөлөө үзүүлдэг. Түүнчлэн энэ нь монгол орны хүнсний бие даасан байдал, хангамжийн тогтвортой байдалд дорвитой дэмжлэг үзүүлэх чухал алхам хэмээн үзэж байна.

“Хөдөө аж ахуйн корпораци” ТӨХХК нь төр, хувийн хэвшил, судалгаа шинжилгээний байгууллагууд болон тариаланчидтай хамтран, түншлэлд суурилсан инноваци, менежментээр хүнсний хувьсгалын зорилго, агуулгыг бодитоор хэрэгжүүлж байгааг ХХААХҮЯ онцолж байна.

Эх сурвалж: ХХААХҮЯ