Санхүүгийн зохицуулах хорооны дарга Т.Жамбаажамц өнөөдөр Олон улсын валютын сангийн (ОУВС) Монгол Улсыг хариуцсан ажлын хэсгийн төлөөлөгчидтэй уулзалт хийлээ. Уулзалтын эхэнд дарга Т.Жамбаажамц санхүүгийн салбарын тогтвортой байдлыг хангах, бэхжүүлэх чиглэлд хэрэгжүүлж буй бодлого, үйл ажиллагааны талаар танилцуулсан юм.

Хоёр талын уулзалтаар Монгол Улсын эдийн засгийн нөхцөл байдал, тэр дундаа хөрөнгийн зах зээлийн хөгжил, банк бус санхүүгийн байгууллагын бүтээгдэхүүн, үйлчилгээний өргөжилтийн асуудлуудыг хэлэлцэв. СЗХ-ноос хөрөнгийн зах зээлийн дүрэм журмын орчныг олон улсын жишигт нийцүүлэх, шинэ бүтээгдэхүүн нэвтрүүлэх, хяналт зохицуулалтын арга хэмжээг сайжруулах чиглэлд авч хэрэгжүүлж буй бодлогын талаар дэлгэрэнгүй мэдээлэл өгчээ.

Түүнчлэн банк бус санхүүгийн байгууллагуудаас олгож буй зээлийн чанаргүй багцын өсөлтийг хязгаарлах, зээлийн өр, орлогын харьцааг сайжруулах, эрсдэлийг бууруулах зорилттой зохицуулалтыг авч хэрэгжүүлж байгаа талаар ярилцсан байна. Энэ хүрээнд зээлийн нөхцөл, шалгуур үзүүлэлтийн стандартуудыг шинэчлэх, зөрүүг бууруулах замаар хэрэглэгчийн эрх ашгийг хамгаалж, зээлийн тогтвортой байдлыг хангахад чиглэсэн арга хэмжээг танилцуулжээ.

ОУВС-ийн төлөөлөгчдийг Монгол Улсыг хариуцсан ажлын хэсгийн ахлагч Тахсин Саади Седик ахалж, Монгол дахь суурин төлөөлөгч Тигран Покхосян, салбар хариуцсан ахлах эдийн засагч И Үй болон бусад албаныхан багтсан байна. Эдгээр төлөөлөгчид Монгол Улсад албан томилолтоор ажиллаж байгаа бөгөөд жил бүрийн төлөвлөгөөт ажлын хүрээнд уулзалт хийж, бодлогын зөвлөмж бүхий тайлан бэлтгэн танилцуулдаг юм.

Эх сурвалж: Санхүүгийн зохицуулах хороо