Улаанбаатар хотыг 2025-2028 онд хөгжүүлэх 24 мега төслийн хүрээнд Сонгинохайрхан дүүргийн 5 дугаар хороонд байрлах Ханын материал орчимд 3000 айлын орон сууцны төсөл хэрэгжүүлэхээр төлөвлөжээ. Энэхүү төсөл нь нийслэлийн баруун бүсийн дахин төлөвлөлтийн нэг чухал хэсэг бөгөөд гэр хорооллыг орон сууцжуулах бодлогын хүрээнд хэрэгжүүлж буй томоохон ажлын нэг юм.
Төслийг хоёр үе шаттай хэрэгжүүлэхээр төлөвлөсөн байна. Эхний ээлжид 9.7 га талбайд 1800 айлын орон сууц барих бол, хоёрдугаар ээлжид 6.7 га газарт 1200 айлын орон сууцны барилга барихаар төлөвлөжээ. Одоогийн байдлаар нийт 232 нэгж талбараас 80 гаруй хувийг чөлөөлөөд байгаа бөгөөд 154 өрхтэй гэрээ байгуулснаас 127 иргэн газраа чөлөөлж, нөхөн олговороо хүлээн аваад байна.
Уг төслийн түүхэн талаар дурдахад, НИТХ-ын 2013 оны тогтоолоор Ханын материал орчмын 130 га газрыг дахин төлөвлөлтийн бүсэд хамруулж, “Жи Ди” ХХК-ийг төсөл хэрэгжүүлэгчээр батламжилсан ч 2018 онд эрхийг нь цуцалсан байдаг. Үүний улмаас хохирсон иргэдийг орон сууцанд оруулах ажлыг нийслэлийн зүгээс 2023 онд дахин зохион байгуулж, Нийслэлийн орон сууцны корпораци ХК-ийн оролцоотойгоор зохицуулалт хийжээ.
Төслийн хэрэгжилт үргэлжилж байгаа бөгөөд газраа чөлөөлөөгүй үлдсэн иргэдтэй уулзалт, тохиролцоо хийх ажил үргэлжилж байна. Нийслэл хотын авто замын ачааллыг бууруулах, дэд бүтцийг тэлэх, агаар, хөрсний бохирдлыг бууруулахад чиглэсэн тус мега төслийн хэрэгжилт нь олон нийтийн хүлээлт дагуулсан чухал үйл явц болж байна.
Эх сурвалж: Нийслэлийн Засаг даргын Тамгын газар, Нийслэлийн Орон сууцны корпораци ХК.
