Сайнцагаан суманд хаврын үзлэг, ангилалтын ажлыг “Уудам жаргалант” ХХК-ийн мал үржүүлэг, технологийн ажил үйлчилгээний нэгжтэй хамтран зохион байгуулж, Далай, Тэвш, Үйзэн багийн нийт 3200 хээлтэгч, хээлтүүлэгч хонийг хамрууллаа.

Ангилалтын хүрээнд хонины хаврын амьдын жин, сор үс, ноолуурын урт, биеийн ерөнхий хэмжээсүүдийг хэмжиж, малчдад бог малын хээлтүүлэгчийг хэрхэн зөв сонгож, зөв зохистой үржилд ашиглах талаар зөвлөгөө өгч ажилласан байна. Энэ нь зөвхөн малын шалгаруулалт, ангилал төдийгүй мал үржүүлгийн талаарх мэдлэгийг түгээн дэлгэрүүлэх зорилготой байв.

Жил бүр ийнхүү ангилалт хийж, үр дүнг нь хянаж буй нь хэрэгцээний ангиллын малын эзлэх хувийг бууруулж, цөм сүргийн малын тоог өсгөхөд бодит хувь нэмэр болж байгаа юм. Малчид хавар, намрын жингээ хэмжүүлж, ашиг шимийн талаарх анализыг өөрсдөө хийдэг болсноор сүргийн бүтцийг төлөвлөх, ашиг шимийг нэмэгдүүлэх, үйлдвэрлэлийн үр өгөөжийг нэмэгдүүлэхэд эерэг үр дүнтэй байгааг онцолсон байна.

Эх сурвалж: Сайнцагаан сумын Засаг даргын Тамгын газар