Азийн хөгжлийн банк (АХБ)-аас “Бизнес эрхлэгч эмэгтэйчүүдийн дунд уур амьсгалд тэсвэртэй ногоон болон дижитал эдийн засгийг дэмжих нь” нэртэй буцалтгүй тусламжийн төслийг Монгол Улсад хэрэгжүүлэхээр төлөвлөж эхэллээ. Энэхүү төсөл нь эмэгтэй бизнес эрхлэгчдийн тогтвортой хөгжлийг дэмжихийн зэрэгцээ уур амьсгалын өөрчлөлтөд дасан зохицсон, байгальд ээлтэй, дижитал шийдэлд суурилсан үйлдвэрлэл, үйлчилгээний экосистемийг бий болгох зорилготой юм.
Төслийн төлөвлөлтийн хүрээнд АХБ-ны Манила дахь Зүүн Азийн бүсийн газрын нийгмийн хөгжлийн мэргэжилтэн Б.Цолмон ахлагчтай төлөөлөгчид Монгол Улсын Хүнс, хөдөө аж ахуй, хөнгөн үйлдвэрийн яам (ХХААХҮЯ)-ны Мал аж ахуйн бодлогын хэрэгжилтийг зохицуулах газрын дарга Ц.Мөнхнасан болон харьяа байгууллагуудын төлөөлөлтэй уулзалт хийж, боломжит хамтын ажиллагааны талаар санал солилцсон байна.
Энэхүү төсөл нь хөдөө аж ахуй, мал аж ахуйн салбарт бизнес эрхлэгч эмэгтэйчүүдийн оролцоог нэмэгдүүлэх, технологид суурилсан шийдлүүдийг нэвтрүүлэх, бүтээгдэхүүн үйлдвэрлэл, зах зээлийн сүлжээ, ногоон ажлын байрыг дэмжих зэрэг олон чиглэлээр хэрэгжих юм.
Төслийн санал боловсруулах ажил 2025 он дуустал үргэлжлэх бөгөөд 2026 оны хоёрдугаар улирлаас албан ёсоор хэрэгжиж эхлэхээр төлөвлөжээ. Одоогоор төслийн техник, агуулгын нарийвчилсан зураглал хийгдэж буй бөгөөд холбогдох салбарын төр, хувийн хэвшлийн байгууллагуудын оролцоо, санал хүсэлтийг нээлттэй тусган ажиллаж байгаа аж.
