2025 оны нэгдүгээр улиралд Зээлийн батлан даалтын сан /ЗБДС/-гийн нийт хөрөнгийн хэмжээ 303.4 тэрбум төгрөгт хүрсэн нь өмнөх оны мөн үеэс 10.1 тэрбум төгрөгөөр өссөн дүн юм. Үүнтэй зэрэгцэн батлан даалттай зээлийн үлдэгдэл 782.8 тэрбум төгрөгт хүрч, 2024 оны эхний улиралтай харьцуулахад 3.5 дахин өсжээ.

Эхний улиралд тус сангаас нийт 21.2 тэрбум төгрөгийн 841 батлан даалт шинээр олгосон нь өмнөх оны мөн үеийнхээс 5.2 дахин нэмэгдсэн үзүүлэлт болов. Батлан даалтын дийлэнх хэсэг нь “Шинэ хоршоо” хөдөлгөөн болон ипотекийн зээлийг дэмжихэд чиглэсэн бөгөөд нийт олгосон батлан даалтын 92.6 хувийг эзэлж байна.

Орон нутагт батлан даалтын дүнг бүсчлэн харвал:

• Хангайн бүс: 551 батлан даалт, 20.8 тэрбум төгрөг

• Зүүн бүс: 94 батлан даалт, 4.7 тэрбум төгрөг

• Төвийн бүс: 95 батлан даалт, 4 тэрбум төгрөг

• Баруун бүс: 94 батлан даалт, 3.4 тэрбум төгрөг

• Улаанбаатар хот: 7 батлан даалт, 3.6 тэрбум төгрөг

Улаанбаатар хотын нэг зээлдэгчид ногдож буй батлан даалтын үлдэгдэл дунджаар 237.4 сая төгрөг байгаа бол орон нутагт 23.5 сая төгрөг байна. Үүнээс Зүүн бүс хамгийн өндөр дүнтэй буюу 28.6 сая төгрөгөөр нэг зээлдэгчийг батлан даажээ.

Салбарын ангиллаар авч үзвэл:

• Батлан даалтын 1.9% нь бөөний болон жижиглэн худалдаанд,

• 4.8% нь боловсруулах үйлдвэрлэлд,

• 0.7% нь мэдээлэл, холбооны салбарт ноогдож байна.

• Харин үлдсэн 92.6% нь “Шинэ хоршоо” хөдөлгөөн, ипотекийн зээлд чиглэсэн.

Санхүүжүүлэгч банкуудын хувьд:

• Хаан банк: 54.8%

• Төрийн банк: 32.8%

• Капитрон банк: 7%

• Худалдаа хөгжлийн банк: 2.5%

• Голомт банк: 0.7%

• Ариг банк: 0.2% эзэлж байна.

Батлан даалтын эх үүсвэрийн 87.1 хувийг “Шинэ хоршоо” хөдөлгөөн, 7.2 хувийг Азийн хөгжлийн банкны МОН-3338 төсөл, 5.7 хувийг ипотекийн санхүүжилт, 0.3 хувийг Жижиг, дунд үйлдвэрийг хөгжүүлэх сан бүрдүүлжээ.

Олгогдсон батлан даалтын дундаж хугацаа 6.1 жил буюу 72.1 сар байгаа нь өмнөх оныхоос 12.7 жилээр буурсан үзүүлэлт юм.

Батлан даалтаар зээл авсан этгээдүүдийн ангилал:

• Иргэд: 90.5%

• Аж ахуйн нэгжүүд: 9.5%

ААН-д олгосон 9.5 хувийн батлан даалтын дийлэнх нь боловсруулах үйлдвэр (7.1 тэрбум төгрөг), худалдаа (1.3 тэрбум төгрөг), мэдээлэл холбоо (0.5 тэрбум төгрөг) зэрэгт хамаарч байна. Иргэдэд олгогдсон 33 тэрбум төгрөгийн батлан даалтын 80 орчим хувь нь “Шинэ хоршоо” болон ипотекийн зориулалттай байжээ.

Чанаргүй батлан даалтын түвшин:

2025 оны эхний улиралд чанаргүй батлан даалтын үлдэгдэл 6 тэрбум төгрөгт хүрч, нийт үлдэгдлийн 1.3 хувийг эзэлсэн нь өмнөх оныхоос 4 пунктээр буурсан үзүүлэлт болов.

Салбараар нь харвал:

• 50.2% нь боловсруулах үйлдвэр,

• 23.6% нь худалдаа,

• 9.6% нь барилга,

• бусад нь эрүүл мэнд, боловсрол, шинжлэх ухаан, тээвэр зэрэг салбаруудад ногджээ.

Сангийн хөрөнгийн өгөөж 2025 оны эхний улиралд 4.7 хувьтай гарсан нь 2023 оны үзүүлэлтээс 3 пунктээр өссөн дүн байв.

Эх сурвалж: СЗХ-ны нэгтгэсэн тайлан