Монголын аялал жуулчлалын салбарын төлөөлөл “Go Mongolia” үндэсний брэндийн дор БНСУ-д болж буй Дэлхийн аялал жуулчлалын Солонгосын үзэсгэлэнд (Korea World Travel Fair) оролцож байна. Тус үзэсгэлэн нь Солонгосын аялал жуулчлалын салбарын хамгийн том арга хэмжээ бөгөөд жил бүр 40 гаруй улс орныг хамруулдаг олон улсын чанартай үзэсгэлэн юм.

Монгол Улсаас Соёл, спорт, аялал жуулчлалын яам, НАЖГ, “Улаанбаатар” театр, Аялал жуулчлалын мэргэжлийн холбооны 9 тур оператор компанийн 28 төлөөлөгч оролцож, Монголын аялал жуулчлалын бүтээгдэхүүн, үйлчилгээ, өв соёл, уламжлалыг танилцуулж байна. Үзэсгэлэнгийн үеэр бизнес уулзалтууд зохион байгуулж, мэдээллийн танилцуулга, соёлын тоглолт зэрэг олон талт арга хэмжээг өрнүүлж байна.

2023 онд Монгол Улсад нийт 727 мянган жуулчин ирсэн бол үүнээс 194 мянга буюу 26.7 хувийг БНСУ-ын жуулчид эзэлжээ. Солонгосоос ирсэн жуулчдын 80 гаруй хувь нь амралт, аялал жуулчлалын зорилгоор ирсэн нь хоёр орны аялал жуулчлалын харилцаа идэвхтэй байгааг илтгэж байна. Иймд тус харилцааг улам гүнзгийрүүлж, жуулчдын тоог нэмэгдүүлэх зорилгоор Монголын төлөөлөгчид тус үзэсгэлэнд нэгдэн оролцож байна.

Солонгосын аялал жуулчлалын үзэсгэлэн нь дотоод, гадаадын аялал жуулчлалын байгууллагуудын хоорондын хамтын ажиллагааг хөгжүүлж, шинэ зах зээл, бизнесийн боломжийг бүрдүүлэхэд чухал үүрэг гүйцэтгэдэг гэдгээрээ дэлхийд нэр хүндтэйд тооцогддог.