Архангай аймгийн 2025 оны хаврын тариалалтын явц 70 гаруй хувийн гүйцэтгэлтэй үргэлжилж буйг аймгийн Хүнс, хөдөө аж ахуйн газраас мэдээллээ. Хөдөө аж ахуйн улирал ид үргэлжилж буй энэ үед аймгийн төв болон тариалангийн бүс нутгуудад тариалалтын гол ачааллыг үүрч ажиллаж байна.

Одоогийн байдлаар нийт 8064 га талбайд үр тариа, 10 га-д төмс, 6 га-д хүнсний ногоо, 320 га-д малын тэжээл, 420 га-д тосны ургамал тариалаад байна. Үүний дийлэнхийг аймгийн тариалангийн гол бүсүүд болох Төвшрүүлэх, Хайрхан, Хотонт сумд эзэлж байгаа бөгөөд:

• Төвшрүүлэх сум – 5629.6 га

• Хайрхан сум – 1880 га

• Хотонт сум – 1310 га

тариалалт хийжээ.

Бусад сумдын хувьд уур амьсгал, хөрсний онцлог, бэлчээрийн ашиглалтаас шалтгаалан харьцангуй бага талбайд буюу 0.2 га-аас 30 га хүртэл тариалалт хийж буй бөгөөд тус бүрийн нөхцөлд тохируулан тариалалтын ажлыг төлөвлөсөн байна.

Аймгийн хэмжээнд үр тарианы хэмжээ эрс нэмэгдэж байгаа нь хүнсний аюулгүй байдал, малын тэжээлийн хангамжийг дотоодоос бүрдүүлэх стратегийн зорилттой уялдаж байгаа бөгөөд цаг агаарын тааламжтай нөхцөл хадгалагдвал хаврын тариалалт төлөвлөгөөт хэмжээндээ хүрэх боломжтой хэмээн мэргэжилтнүүд үзэж байна.

Эх сурвалж: Архангай аймгийн Хүнс, хөдөө аж ахуйн газар