Монголын Барилгын Үндэсний Ассоциацийн дэргэд байгуулагдсан “Барилга, дэд бүтцийн Олон улсын Арбитр” өнөөдөр албан ёсоор нээлтээ хийж, барилгын салбар дахь маргааныг олон улсын түвшинд шийдвэрлэх шинэ хуудсыг нээж байна.

Уг арбитрыг байгуулах санаачилгыг Барилгын үндэсний ассоциаци өнгөрсөн онд дэвшүүлж, бүтээн байгуулалттай холбоотой маргаануудыг мэргэжлийн түвшинд, хараат бус байдлаар шийдвэрлэх зорилготойгоор ажил хэрэг болгосон юм. Арбитр нь иргэний болон үйлдвэрлэлийн барилга, замын байгууламж, эрчим хүч, уул уурхай зэрэг мега төслүүдийн хүрээнд байгуулсан гэрээ, FIDIC болон EPC төслүүдтэй холбоотой маргааныг нэг шаттай шийдвэрлэх боломжтойгоороо шүүхийн уламжлалт шат дараалалаас ялгарах онцлогтой.

Барилга, дэд бүтцийн олон улсын арбитрын Төлөөлөн удирдах зөвлөлийн дарга Б.Баасансүрэн хэлэхдээ:
“Барилгын салбар хурдацтай хөгжиж, төслүүдийн цар хүрээ, өртөг нэмэгдэж байгаа энэ үед маргаанаас үүдэлтэй ажил зогсох, удаашрах асуудлыг шуурхай, мэргэжлийн түвшинд шийдвэрлэх шаардлага тулгарч байна. Төрөлжсөн арбитрын тусламжтайгаар шүүхэд хандахаас өмнө асуудлыг эвлэрүүлэн зуучлах, хөндлөнгийн дүгнэлт гаргах, маргааныг богино хугацаанд шийдвэрлэх боломж бүрдсэн” хэмээв.

Тэрбээр мөн “Арбитрын бүрэлдэхүүнийг сонгон шалгаруулахдаа инженер болон эрх зүй хосолсон мэдлэгтэй, туршлагатай мэргэжилтнүүдийг сонгосон. Өнөөдөр 35 арбитрч тангараг өргөж, үүрэгт ажилдаа орж байна. Тэдний 25 хувь нь докторын зэрэгтэй, 50 хувь нь инженер, санхүү, эрх зүйн хос мэргэжилтэй мэргэжилтнүүд юм” гэдгийг онцолжээ.

Энэхүү арбитрын байгууллага нь цаашид барилга, дэд бүтцийн төслийн уялдаа холбоог хангах, гүйцэтгэлтэй холбоотой зөрчил, маргаанд шинжлэх ухаанч үндэслэлтэй, хууль зүйн дүгнэлт гаргах, олон улсын жишигт нийцсэн шударга, үр дүнтэй шийдвэрлэлийг хэрэгжүүлэхэд чухал үүрэг гүйцэтгэнэ хэмээн үзэж байна.

Эх сурвалж: Монголын Барилгын Үндэсний Ассоциаци