Багануурын 50 МВт-ын хүчин чадалтай батарей хуримтлуурын станц ашиглалтад орсноос хойш төвийн бүсийн эрчим хүчний системд нийт 30.372 сая кВт.цаг эрчим хүч нийлүүлээд байна. Энэхүү байгальд ээлтэй, ногоон технологи бүхий станц нь шөнийн ачаалал багатай үед эрчим хүч хуримтлуулж, өдөр, оройн оргил ачааллын үед буцаан нийлүүлдэг хосгүй давуу талтай. Энэ нь Улаанбаатар хотын ачаалал өндөртэй эрчим хүчний хэрэглээнд мэдэгдэхүйц нөлөө үзүүлж байна.

Улаанбаатар хот нь улсын хэмжээнд нийт эрчим хүчний хэрэглээний 60 гаруй хувийг дангаар бүрдүүлдэг бөгөөд дунджаар 1245 МВт ачаалалтайгаар системд ажилладаг. Өнгөрсөн өвөл буюу 2023-2024 оны шилжилтийн улиралд тус бүс нутгийн эрчим хүчний систем 200 МВт чадлын дутагдалд орсон ч шинэ эх үүсвэрүүдийг ашиглалтад оруулснаар уг дутагдлыг богино хугацаанд нөхөж чадсан байна.

Тухайлбал, Бөөрөлжүүтийн 150 МВт цахилгаан станц болон Багануурын батарей хуримтлуурын 50 МВт станц 2024 оны арванхоёрдугаар сараас эхлэн төвийн системд эрчим хүч нийлүүлж эхэлсэн. Бөөрөлжүүтийн станц нь өнөөдрийн байдлаар Диспетчерийн үндэсний төвийн өгсөн горим, төлөвлөгөөний дагуу тасралтгүй, 100 хувийн гүйцэтгэлтэй ажиллаж, төвийн бүсийн системд тогтмол цахилгаан нийлүүлж байгаа юм.

Эдгээр шинэ эх үүсвэрүүд нь Монгол Улсын эрчим хүчний аюулгүй байдлыг хангах, байгальд ээлтэй, тогтвортой хөгжлийн зорилтыг хэрэгжүүлэхэд чухал хувь нэмэр оруулж байгааг мэргэжилтнүүд онцолж байна.

Эх сурвалж: Диспетчерийн үндэсний төв, Эрчим хүчний яам