Парис хотноо болсон Дэлхийн мал амьтны эрүүл мэндийн байгууллагын (WOAH) 92 дахь Ерөнхий чуулганы үеэр Монгол Улсын шүлхий өвчинтэй тэмцэх хяналтын хөтөлбөрийг албан ёсоор батламжилж, гэрчилгээг гардууллаа. Энэ нь Монгол Улсын зүгээс хэрэгжүүлж буй шүлхий өвчнөөс урьдчилан сэргийлэх, эрт илрүүлэг, хяналт, тэмцлийн арга хэмжээ олон улсын стандартын хүрээнд хэрэгжиж байгааг хүлээн зөвшөөрсөн томоохон алхам болж байна.
Мал эмнэлгийн ерөнхий газрын мэдээлснээр уг гэрчилгээ нь мал, амьтны гаралтай бүтээгдэхүүнийг бүс нутгийн болон олон улсын зах зээлд гаргах, экспортын боломжийг нэмэгдүүлэхэд чухал нөлөө үзүүлэх юм. Шүлхий нь олон улсын худалдаанд хүндрэл учруулдаг гол халдварт өвчний нэг учраас уг хөтөлбөр баталгаажсан нь эрсдэл бууруулж, Монголын мал аж ахуйн салбарт эдийн засгийн шинэ боломж нээж байна.
Хөтөлбөрийн хэрэгжилтийг жил бүр WOAH-д тайлагнаж, хяналт, үнэлгээнд хамруулдаг бөгөөд ингэснээр гэрчилгээний үргэлжлэх хугацаа, итгэлцлийг баталгаажуулж байдаг.
Эх сурвалж: Мал эмнэлгийн ерөнхий газар, WOAH.org
