УИХ-ын Төсвийн байнгын хорооны өнөөдрийн хуралдаанаар Монгол Улсын 2026 оны нэгдсэн төсвийн хүрээний мэдэгдэл болон 2027-2028 оны төсвийн төсөөллийн тухай хуулийн төслийг эцэслэн хэлэлцлээ.

Монгол Улсын хууль тогтоомжийн дагуу УИХ дунд хугацааны төсвийн хүрээний мэдэгдлийг жил бүрийн зургаадугаар сарын 1-ний дотор хэлэлцэн батлах үүрэгтэй. Энэ хүрээнд боловсруулсан хуулийн төсөлд эдийн засгийн өсөлтийг 2026 онд 6 хувь, 2027-2028 онуудад тус бүр 6.5 хувь байхаар тооцжээ. Харин инфляцын түвшинг 2026 онд 7 хувь, 2027 онд 6.4 хувь, 2028 онд 6 хувь байхаар төлөвлөсөн байна.

Эдийн засгийн тогтвортой өсөлтийг хангах, инфляцыг бууруулахын тулд дараах бодлогын арга хэмжээг хэрэгжүүлэхээр тусгасан байна. Үүнд:

• Хөдөө аж ахуйн салбарт цогц шинэчлэл хийж, хүнсний нийлүүлэлтийг тогтвортой нэмэгдүүлэх

• Гадаад валютын улсын албан нөөцийг нэмэгдүүлэх

• Төсвийн зардлын тэлэлтийг хязгаарлах

Эдгээр бодлогын хүрээнд төсвийн сахилга батыг сайжруулах, эдийн засгийн уян хатан байдлыг нэмэгдүүлэх, ирэх гурван жилийн эдийн засгийн нөхцөл байдлыг урьдчилан тооцож, төлөвлөх бодлогын үндэс бүрдэж байгааг хуралдааны үеэр онцоллоо.

Эх сурвалж: УИХ-ын Хэвлэл мэдээллийн газар