Монгол Улсын Гаалийн Ерөнхий газраас 2025 оны зургаадугаар сард хилийн боомтуудын ажиллах болон түр хаах цагийн хуваарийг танилцууллаа. Уг хуваарьт агаарын, төмөр, авто замын нийт 23 боомтын мэдээлэл багтсан байна.

Чингис хаан олон улсын нисэх буудал олон улсын нислэгийн цагийн хуваарийн дагуу хэвийн ажиллана. Алтанбулаг авто замын боомт өдөр бүр 24 цагаар ажиллах бол төмөр замын боомтууд болох Сүхбаатар, Эрээнцав, Замын-Үүд нь олон улсын галт тэрэгний цагийн хуваарийн дагуу нээлттэй байна.

ОХУ-тай хиллэдэг авто замын боомтуудаас Ульхан, Тэс, Боршоо, Арцсуурь, Нөмрөг, Ханх боомтууд 2025 оны зургаадугаар сарын 1, 11, 12, 13-ны өдрүүдэд түр хугацаанд хаагдана. Эрээнцав авто замын боомт цагийн хуваарийн дагуу ажиллана.

Харин БНХАУ-тай хиллэдэг авто замын Гашуунсухайт, Шивээхүрэн, Бургастай, Бичигт, Сүмбэр, Баянхошуу, Булган боомтууд тогтсон цагийн хуваарийн дагуу хэвийн ажиллах бол Даян боомт зургаадугаар сарын 1-нээс 20, мөн 26-наас долоодугаар сарын 10-ныг дуустал нээлттэй байх бөгөөд бусад хугацаанд түр хаагдана.

Иргэд болон тээврийн байгууллагууд хил нэвтрэх төлөвлөгөөгөө батлахдаа дээрх хугацааг харгалзан үзэхийг Гаалийн ерөнхий газар сануулж байна.

Эх сурвалж: Гаалийн ерөнхий газар