Барилгын үйл ажиллагааны тусгай зөвшөөрлийг 2025 оны зургаадугаар сарын 10-наас эхлэн license.mn цахим системээр дамжуулан авах боломж бүрдлээ. Энэ нь барилгын салбар дахь томоохон шинэчлэл бөгөөд Хот байгуулалт, барилга, орон сууцжуулалтын яамнаас олгодог дараах үйл ажиллагаанд хамаарах тусгай зөвшөөрлийг хамарч байна:

• Барилга байгууламжийн зураг төсөл боловсруулах

• Барилгын ажил гүйцэтгэх

• Өргөх байгууламж, түүний эд ангийн үйлдвэрлэл, угсралт

• Засвар үйлчилгээ эрхлэх

Засгийн газрын Хэрэг эрхлэх газар болон Зөвшөөрлийн зөвлөлөөс улс орон даяар тусгай зөвшөөрлийг нэг цонхны зарчмаар олгох зорилгоор энэхүү системийг ашиглалтад оруулж байгаа юм.

license.mn системийн гол давуу талууд:

• Цахим бүрдүүлэлт: Бүх материалыг цахимаар илгээх тул дугаарлах, цаасан материал хэвлэх шаардлагагүй болно.

• Цахим гэрчилгээ: QR кодтой, нууцлалтай гэрчилгээ олгоно.

• Цагийн хязгааргүй үйлчилгээ: Ажлын цагаас үл хамааран хүссэн үедээ үйлчилгээнд хандах боломжтой.

• Ил тод байдал: Шийдвэр гаргах шат бүрийг систем бүртгэж үлдэх тул хүнд суртал буурч, хяналт тавих боломж бүрдэнэ.

• Инженер техникийн ажилтны шилжилт: Компанийн хариуцлагыг нэмэгдүүлж, тухайн байгууллага өөрөө шилжилт хийх боломжтой.

• Ашиг сонирхлын зөрчлөөс ангид: Хүний оролцоо багасаж, шийдвэр гаргалт илүү шударга болно.

Шинэчлэлийн талаар Төрийн нарийн бичгийн даргын үүргийг түр орлон гүйцэтгэгч С.Төмөрхүү, Барилгын материалын хэлтсийн дарга Д.Батзориг, “Монголын Барилгын Үндэсний Ассоциаци” ТББ-ын ерөнхийлөгч Н.Баярсайхан нар мэдээлэл өгсөн бөгөөд энэ тогтолцоо нь зөвшөөрөл олголтыг илүү үр ашигтай, хариуцлагатай, хөндлөнгийн хяналттай болгоно гэдгийг онцолсон байна.

Эх сурвалж: Барилга.мн, license.mn