“Шинэ хөдөө” төслийн хүрээнд Дархан-Уул аймагт газар тариалан болон эрчимжсэн мал аж ахуй эрхлэгчдэд зориулсан 90 гаруй нэр төрлийн техник, тоног төхөөрөмжийг хүлээлгэн өгсөн байна. Уг тоног төхөөрөмжийг 3 тэрбум төгрөгийн хөрөнгө оруулалтаар шийдвэрлэж, өчигдөр албан ёсоор орон нутгийн иргэдэд хүлээлгэн өгчээ.

Тоног төхөөрөмжийн сонголтыг ХАА-н салбарынхан өөрсдөө гаргасан саналд тулгуурлан хийсэн бөгөөд гурван улирлын хүлэмж, хадлангийн иж бүрдэл, усалгааны систем, трактор зэрэг нэн шаардлагатай техникүүдийг багтаажээ.

Энэхүү хөрөнгө оруулалт нь бичил бизнес эрхлэгчдийг дэмжих, ажлын бүтээмжийг нэмэгдүүлэх, улмаар амьдралын чанарыг дээшлүүлэхэд чиглэж буй бөгөөд орон нутгийн хөдөө аж ахуйн хөгжилд бодит дэмжлэг үзүүлэх юм. Үүнтэй зэрэгцэн тогтвортой үйлдвэрлэл, орлого нэмэгдүүлэх замаар хөдөө орон нутгийн хөгжлийг эрчимжүүлэх зорилго агуулсан байна.

Эх сурвалж: Дархан-Уул аймгийн ЗДТГ