“Чингис хаан” олон улсын нисэх буудлын менежментийг хариуцагч “Нью Улаанбаатар Интернэйшнл Эйрпорт” компани Олон улсын нисэх буудлуудын зөвлөл (Airports Council International, ACI)-ийн Ази, Номхон далай, Ойрхи Дорнодын бүсийн гишүүнээр элссэн бөгөөд өнөөдөр гишүүнчлэлийн гэрчилгээг албан ёсоор гардан авлаа.

Гэрчилгээг ACI-ийн бүсийн захирал Стефано Барончи “Нью Улаанбаатар Интернэйшнл Эйрпорт” компанийн гүйцэтгэх захирал Нода Тэцүод гардуулсан юм. Энэхүү үйл явдал нь Монгол Улсын агаарын тээврийн салбарын хувьд олон улсын хамтын ажиллагааг гүнзгийрүүлэх, салбарын менежмент, аюулгүй байдал, хэрэглэгчийн үйлчилгээ, тогтвортой хөгжил зэрэг олон чиглэлд шинэ боломжуудыг нээж буй чухал алхам болж байна.

ACI нь 1991 онд Швейцарын Женев хотод байгуулагдсан бөгөөд дэлхийн 170 оронд 2181 нисэх буудлыг эгнээндээ нэгтгэсэн, салбарын бодлого, стандарт, аюулгүй байдал, үйлчилгээг олон улсын түвшинд уялдуулан хөгжүүлэх эрхэм зорилготой байгууллага юм.

Гишүүнчлэлд нэгдсэнээр Монголын тал олон улсад хүлээн зөвшөөрөгдсөн сургалт, тогтвортой хөгжлийн хөтөлбөрүүд, агаарын тээврийн үйлчилгээний чанарын сайжруулалт, нүүрстөрөгчийн хийн ялгарлыг бууруулах чиглэлээр бодит дэмжлэг авах боломж бүрдэж байна. ACI-ийн бүсийн захирал Стефано Барончи “Монгол Улс энэ бүс нутаг дахь хөгжлийн хурдацад өөрийн хувь нэмрээ оруулж чадна гэдэгт итгэлтэй байна” хэмээн онцлов.

Компанийн гүйцэтгэх захирал Нода Тэцүо “ACI-ийн гишүүн болсноор зөвхөн мэдээлэл хүлээн авагч бус, туршлага түгээгч болох боломж нээгдэж байгаа бөгөөд энэ нь Монголын иргэний нисэхийн салбарын цаашдын хөгжилд стратегийн ач холбогдолтой” хэмээн тэмдэглэлээ.

Эх сурвалж: Нью Улаанбаатар Интернэйшнл Эйрпорт, ACI