Дорноговь аймгийн Иххэт сумын Баян багийн Хүйтний булаг хэмээх газарт “ГБЦС” ХХК малчин С.Мөнхбатын гэр бүлийн хамт 2022 оноос хойш 40-60 га талбайд малын тэжээлийн ургамал, төмс, хүнсний ногоо тарьж, газар тариалангийн чиглэлд амжилттай ажиллаж байна. Тэд өнгөрсөн онд 4000 боодол буюу 100 тонн ногоон тэжээл хураан авч, 1790 боодол тэжээлийг нутгийнхаа 59 малчин, мал бүхий өрхөд борлуулсан бол Хэнтий аймгийн Дархан суманд малчидтай хамтран 30 га талбайгаас 3000 боодол өвс хаджээ.

Тус үйл ажиллагаатай танилцахаар Дорноговь аймгийн ИТХ-ын дарга Н.Алдарбаяр газар дээр нь ажиллаж, С.Мөнхбаттай уулзсан байна. Тэрээр “Хүнсний хангамж, аюулгүй байдал” үндэсний хөдөлгөөнийг орон нутагт эрчимжүүлж, хүнсний ногооны тариалалтыг нэмэгдүүлэх, тариаланчдыг зах зээлд хүргэхэд бодлогоор дэмжиж ажиллахаа илэрхийлжээ.

Энэ онд тэд 70 га-д малын тэжээлийн ургамал, 2 га-д царгас, 2 га-д төмс, хүнсний ногоо тариалахаар төлөвлөсөн бөгөөд “Хүйтний булгийн баялаг” нэртэй анхан шатны хоршоог байгуулж, тэжээлийн тариалалтаа түшиглэн эрчимжсэн мал аж ахуйг хөгжүүлэх зорилготойгоор үйл ажиллагаагаа өргөжүүлж байна.

Эх сурвалж: Дорноговь аймгийн ИТХ