Counter-Strike 2 тоглоомд ашиглагддаг виртуаль эд зүйлс буюу скинүүд нь өнөөдөр уламжлалт хөрөнгө оруулалтын хэрэгслүүд болох алт, биткойн, хувьцаанаас илүү ашигтай хөрөнгө оруулалт болж байна гэж шинжээчид үзэж байна.

Шарпын коэффициент гэх хөрөнгө оруулалтын өгөөж болон эрсдэлийг харьцуулсан гол үзүүлэлтээр:

• CS скинүүд: 0.34

• АНУ-ын хувьцааны зах зээл: 0.25

• Биткойн: 0.21

• Алт: 0.12 үзүүлэлттэй байна.

Скинүүдийн жилийн санхүүгийн өгөөж 41 хувь, харин сарын өгөөж 3.42 хувь гэсэн тооцоог шинжээчид танилцуулжээ. Эдгээр скинүүд нь тоглогчийн зэвсгийн өнгө, дизайн, онцлогийг харуулж, тухайн тоглогчийн зэрэг дэв, ялгарлыг илтгэдэг. Тэдгээрийг тоглоомын явцад худалдаж авах, бусдад зарж борлуулах боломжтой.

Энэ төрлийн хөрөнгө оруулалт хэр үнэ цэнэтэй болсныг 2023 онд нэг нэрээ нууцалсан тоглогч нэг сая ам.доллараар скин худалдан авсан жишээнээс харж болно. Bloomberg-ийн мэдээлснээр Counter-Strike тоглоом дахь скин зах зээлийн үнэлгээ 4.3 тэрбум долларыг давсан байна.

Шинжээчдийн дүгнэлтээр энэ зах зээл улам бүр тэлж, тоглогчдын орлого олох шинэ хэлбэр болж буй бөгөөд виртуаль эд зүйлс уламжлалт хөрөнгө оруулалтын багцад өрсөлдөгч болж хувирсан гэж дүгнэжээ.

Эх сурвалж: OfficeLife.media, Bloomberg