Засгийн газрын ээлжит хуралдаан өнөөдөр болж, ноолуурын бэлтгэл, зах зээлийн өнөөгийн байдлын талаар Хүнс, хөдөө аж ахуй, хөнгөн үйлдвэрийн сайд Ж.Энхбаяр танилцуулга хийлээ. Тэрбээр өмнөх буюу 2025 оны дөрөвдүгээр сарын 23-ны өдрийн Засгийн газрын 19 дүгээр хуралдааны тэмдэглэлд тусгагдсан чиглэлийг дахин танилцуулсан бөгөөд энэ нь ноолуурын үнийн бодит нөхцөл байдлыг харгалзан үзэж, 500 тэрбум төгрөгийн дүнтэй, жилийн 12 хувийн хүүтэй энгийн вексель гаргах үүрэг даалгаврыг холбогдох байгууллагад өгсөн тухай байв.

Энэхүү шийдвэрийн хүрээнд үйлдвэрлэгчид, мэргэжлийн холбоо, холбогдох албан тушаалтнуудтай уулзалт зохион байгуулж, ноолуур бэлтгэлийн явц, бизнесийн орчны өөрчлөлт, түүхий эдийн худалдан авалт, дотоод болон гадаад зах зээлийн чиг хандлага, тулгамдаж буй асуудлыг хэлэлцсэн байна. Ялангуяа баруун бүсийн үйлдвэрлэгчид эргэлтийн хөрөнгийн дутагдалтай байгаа тул векселийг хэрхэн мөнгөжүүлэх, түүхий эдийг барьцаалах, малчдаас тогтвортой үнээр худалдан авах зэрэг асуудлыг онцлон хөнджээ.

Монгол Улс энэ онд ноолуурын салбарт анх удаа түүхий эдийн 50 хувийг бэлтгэж эхэлсэн нь дотоодын боловсруулах үйлдвэрийн түүхий эдийн хангамжийг тогтворжуулахад ахиц гаргасан гэж үзэж байгаа бөгөөд цаашид уг хэмжээг 100 хувьд хүргэх зорилт тавин ажиллаж байна. Үүнтэй зэрэгцэн ноолуурын үнийг тогтворжуулах, үйлдвэрлэлийн тасралтгүй үйл ажиллагааг хангах, болзошгүй хүндрэлүүдийг эрсдэл багатайгаар даван туулахад Засгийн газар, хувийн хэвшил, мэргэжлийн холбоодын хамтын ажиллагаа чухал гэдгийг сайд Ж.Энхбаяр онцолсон юм.

Эх сурвалж: Засгийн газрын хэвлэл мэдээлэл, олон нийттэй харилцах газар