Монголын барилгачдын нэгдсэн холбооны ээлжит VII их хурал болж, барилгын салбарыг мэргэжлийн өндөр түвшинд хүргэх, үндэсний бүтээн байгуулалтад оролцох боломж, шаардлагыг хэлэлцэн, “Шинэ 100 стратеги”-ийг танилцуулж байна. Уг стратеги нь барилгын салбарын хөгжилд тулгамдаж буй асуудлуудыг шийдвэрлэх, салбарын тогтвортой өсөлтийг хангах, ирээдүйд үнэ цэнтэй нийгмийг бий болгох зорилготой юм.

Хууль эрх зүйн шинэчлэл
Барилгын салбарын хууль эрх зүйн орчинг боловсронгуй болгох, давхардал зөрчлийг арилгах, бизнес эрхлэгчдэд илүү таатай нөхцөл бүрдүүлэхийг зорьжээ. Үүнд:

• Улсын төсвийн хөрөнгө оруулалтаар ажил гүйцэтгэж буй компаниудад тавих шаардлагыг чангатгаж, хариуцлага тооцох.

• Хувийн хэвшлийн бүтээн байгуулалтын компанийн хариуцлагыг нэмэгдүүлж, иргэдийг хохироохгүй байх тогтолцоог төр, төрийн бус байгууллагууд хамтран хөгжүүлэх.

• Хөдөлмөрийн аюулгүй байдал (ХАБ)-ыг сайжруулах сургалт, соён гэгээрүүлэх үйл ажиллагааг тогтмол зохион байгуулах.

• Зөвлөх үйлчилгээний чанарыг сайжруулж, төр, хувийн хэвшлийн хамтын ажиллагааг өргөжүүлэх.

Эдийн засгийн шинэчлэл
Барилгын норм дүрмийг олон улсын жишигт нийцүүлэн шинэчилж, төсвийн үнэлгээг зах зээлийн зарчимд нийцүүлнэ. Төсөв зохиох аргачлалыг шинэчилж, томсгосон нормын тогтолцоог нэвтрүүлнэ. Тендерт шалгарсан компаниудад урьдчилгаа 30 хувийг олгодог санхүүжилтийн схемийг сэргээх санал гаргасан нь санхүүгийн дарамтыг бууруулахад чиглэж байна.
Мөн татвар болон нийгмийн даатгалын шимтгэлийг бууруулах саналыг дэвшүүлж, иргэдийн амьдралын чанарыг дэмжих зорилт тавьжээ.

Хот байгуулалт, бүс нутгийн уялдаа
Улаанбаатар хотын дахин төлөвлөлт, мега төслүүдэд үндэсний компаниудыг 100 хувь оролцуулах бодлого баримтлаж байна. Үүнд:

• Барилгын материалын лаборатори, хяналтын тогтолцоог бэхжүүлэх,

• Үйлдвэрлэгчдийг хөнгөлөлттэй зээлд хамруулах,

• Гадаад ажиллах хүчний шаардлагыг судлан, төлбөрийн нөхцөлийг бууруулах санал гаргажээ.

Нийгмийн хамгаалал ба залуу боловсон хүчин
Салбарын ажилтнуудын тэтгэврийн асуудлыг тодорхой болгох, хувиараа ажиллагчдыг бүртгэлжүүлэх, эрүүл мэндийн үзлэгт хамруулах, ипотекийн зээлд хамруулах нөхцөлийг бодлогын түвшинд дэмжихийг зорьж байна.

Эдгээр санал, бодлогын чиглэлүүдийг холбогдох төрийн байгууллагад уламжлан, шийдвэр гаргуулах хүрээнд нэгдсэн холбоо нь идэвхтэй ажиллаж байгаа гэдгээ хурлын үеэр мэдэгдэв.

Эх сурвалж: Монголын барилгачдын нэгдсэн холбоо