2025 оны тавдугаар сарын 13–15-ны өдрүүдэд БНХАУ-ын баруун урд бүс нутагт болсон коксжих нүүрс, коксын зах зээлийн XII удаагийн олон улсын уулзалтад “Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн болон Уул уурхайн бүтээгдэхүүний арилжааны биржийн гишүүнчлэл хариуцсан мэргэжилтэн А.Цэрэнлхам нар оролцлоо.

Тэд уулзалтад оролцогчдод Монголын уул уурхайн бүтээгдэхүүний биржийн арилжааны зах зээлийг сурталчлан таниулах, олон улсын оролцогчдын тоог нэмэгдүүлэх, хамтын ажиллагааг өргөжүүлэх зорилгоор дэлгэрэнгүй мэдээлэл хүргэж, биржийн арилжааны журам, шинэчлэл, зарчим зэргийг танилцуулсан юм.

Мөн БНХАУ-ын Сычуань мужийн Чэндү хотод зохион байгуулагдсан ган, төмрийн хүдэр, өнгөт металл, эрчим хүчний олон улсын зах зээлийн MySteel.com платформын төлөөлөлтэй уулзаж, Монголын хөрөнгийн биржээс хэрэгжүүлж буй нүүрсний үнийн индексжүүлсэн арилжаа-ны нөлөөлөл, үр нөлөөний талаар хамтарсан судалгааны ажлыг эхлүүлэх талаар санал солилцсон байна.

Цаашид нүүрсний төрөл тус бүрээс гадна төмрийн хүдэр, зэсийн баяжмал зэрэг бүтээгдэхүүнийг мөн индексжүүлсэн үнэ дээр үндэслэн арилжаалах боломжийг судалж, олон улсын жишигт нийцсэн арилжааны бүтэц бүрдүүлэхэд анхаарч байгаагаа уулзалтаар танилцуулжээ.

Тус чуулга уулзалтад БНХАУ-ын нүүрс угаах, коксын болон гангын үйлдвэрүүдийн 300 гаруй аж ахуйн нэгж, компанийн төлөөлөл оролцсон нь олон улсын хэмжээнд Монголын хөрөнгийн биржийн идэвхтэй оролцоог бататгасан томоохон алхам боллоо.

Эх сурвалж: Монголын хөрөнгийн бирж