Үндэсний статистикийн хорооны мэдээлснээр 2025 оны дөрөвдүгээр сарын байдлаар гүйлгээнд гарсан бэлэн мөнгө 1.1 их наяд төгрөгт хүрсэн нь өмнөх оны мөн үеэс 0.6 тэрбум төгрөгөөр өссөн байна. Энэ нь мөнгөний эргэлт нэмэгдэж буйг илтгэж байгаа бол нийлүүлэлтийн бүтцийн 88.2 хувийг дотоод цэвэр актив бүрдүүлсэн нь дотоод эдийн засгийн идэвхжил нэмэгдсэнийг харуулж байна. Дотоод цэвэр актив 36.6 их наяд төгрөгт хүрч, нэг жилийн хугацаанд 8.3 их наядаар өссөн бол гадаад цэвэр актив 4.9 их наяд төгрөгт хүрч, 1 их наядаар буурсан нь анхаарал татаж байна.

Хадгаламжийн хэмжээ өсөлттэй хэвээр байна. Төгрөгийн хадгаламж 21.9 их наяд төгрөгт хүрч, өмнөх жилийн мөн үеэс 3.3 их наяд төгрөгөөр өссөн. Иргэдийн хадгаламж 19.2 их наяд төгрөгөөр голлон бүрдэж байгаагаас гадна валютын хадгаламж 5.2 их наяд төгрөг болж 874.4 тэрбум төгрөгөөр нэмэгдсэн нь хөрөнгө оруулагчид ханшийн хэлбэлзлээс хамгаалах зорилгоор валют хадгалж буй хандлагыг харуулж байна.

Нийт зээлийн өрийн үлдэгдэл 39.8 их наяд төгрөгт хүрч, өмнөх оноос 9.9 их наядаар нэмэгдсэн. Үүний 60.1 хувь нь иргэд, 37.1 хувь нь хувийн хэвшилд ногдож байна. Хэвийн зээл нийт зээлийн 90.9 хувийг эзэлж байгаа нь санхүүгийн салбарын тогтвортой байдлыг харуулж байгаа ч 5.2 хувийг эзэлж буй чанаргүй зээлийн үлдэгдэл эрсдэл дагуулсаар байна.

Төгрөгийн ханш 2024 оны мөн үеэс бүх гол валютын эсрэг суларсан үзүүлэлттэй байна:

• Ам.доллар: 3541.60 төгрөг (165.1 төгрөгөөр сул)

• Евро: 3978.76 төгрөг (355.2 төгрөгөөр сул)

• Оросын рубль: 42.53 төгрөг (6.2 төгрөгөөр сул)

• Хятадын юань: 485.09 төгрөг (18.7 төгрөгөөр сул)

Эдгээр ханшийн өөрчлөлт нь гадаад валютын урсгал, гадаад өр, экспортын орлого зэрэг хүчин зүйлстэй нягт уялдаатай бөгөөд дунд хугацаанд инфляц болон хэрэглээний зардалд тодорхой нөлөө үзүүлж болзошгүй.

Эх сурвалж: Үндэсний статистикийн хороо