Үндэсний статистикийн хорооны мэдээлснээр, 2025 оны дөрөвдүгээр сарын байдлаар мал, түүхий эдийн дундаж үнэ олон аймагт өссөн үзүүлэлттэй гарчээ. Хамгийн өндөр үнэтэй малд атан тэмээ тооцогдож байгаа бөгөөд нэг толгойн үнэ 1.5 сая төгрөгт хүрч, өнгөрсөн оны мөн үеийнхээс 110.1 мянган төгрөгөөр нэмэгджээ.

Соёолон үрээний үнэ ч өсөлттэй байна. Нэг үрээний үнэ 1.2 сая төгрөгт хүрсэн нь жилийн өмнөхөөс 51.8 мянган төгрөгөөр өссөн үзүүлэлт юм. Мөн эр хонины үнэ 29.1 мянган төгрөгөөр нэмэгдэж 280 мянгад хүрчээ. Эр ямааны үнэ 32.4 мянгаар өсч 180 мянган төгрөг болсон байна.

Харин хязаалан гунан үхрийн үнэ бага зэргээр буурч, 1.4 сая төгрөгт хүрсэн байна. Малын үнийн тооцоонд өдөр тутмын хэрэглээнд зориулагдсан буюу хүнс, ашиг шим, уналга, эдэлгээний зориулалтаар борлуулсан малыг хамруулдаг болохыг ҮСХ-ноос тодотгожээ. Харин хурдны, шилмэл омгийн өндөр үнэтэй малын үнийг дундаж тооцоонд оруулдаггүй юм.

Түүхий эдийн хувьд үхрийн 2 метрээс дээш урттай ширний үнэ 7.7 мянган төгрөг болж, өмнөх оноос 4 мянган төгрөгөөр өссөн байна. Харин цагаан ноолуурын 1 кг-ын дундаж үнэ 120 мянган төгрөг болж, 31 мянган төгрөгөөр буурсан нь анхаарал татаж байна. Гэсэн ч ноолуурын үнэ аймгуудаар харилцан адилгүй байгаа бөгөөд Хөвсгөл аймагт хамгийн өндөр буюу 141 мянган төгрөгт хүрсэн бол Говь-Алтай аймагт хамгийн бага буюу 100 мянган төгрөг байна.

Эх сурвалж: Үндэсний статистикийн хороо