Ховд аймагт залуучуудын хөдөлмөр эрхлэлт, гарааны бизнесийг дэмжих чиглэлээр олон нийтийн оролцоонд тулгуурласан төсөл, хөтөлбөрүүд тасралтгүй хэрэгжиж байна. Тухайлбал, тус аймгийн Хөдөлмөр, халамжийн үйлчилгээний газар 2017 оноос эхлэн "Залуучуудын хөдөлмөр эрхлэлтийг дэмжих хөтөлбөр"-ийн хүрээнд “Start up” үйл ажиллагааг жил бүр зохион байгуулж, 50 гаруй шинэ бизнес санааг 10 сая төгрөгийн санхүүжилтээр дэмжжээ. Эдгээрт эко гутал, ингэний ферм, тоглоомын төв зэрэг орон нутгийн онцлогт тохирсон олон төрлийн санаа багтсан байна.

2025 онд хэрэгжих “Start up-2025” уралдаан гурван үе шаттайгаар явагдаж байна. Энэхүү уралдаан нь:

• Шинэ технологи, инновац шингээсэн гарааны бизнесийг өргөжүүлэх

• Бизнесээ эхлүүлж буй залууст мэргэжлийн зөвлөгөө өгөх

• Бүтээлч санааг олон нийтэд сурталчлах зорилготой юм.

Уралдаанд 15-34 насны залуус оролцох боломжтой бөгөөд бүртгэл тавдугаар сарын 11 хүртэл үргэлжилж, дараах үе шаттайгаар зохион байгуулагдана:

• Тавдугаар сарын 12-15: Сургалт, хувь хүний үнэлгээ

• Тавдугаар сарын 16: "Demo day" эцсийн шалгаруулалт

Тус уралдааныг Ховд аймгийн Хөдөлмөр, халамжийн үйлчилгээний газар, “Старт ап Монгол” төрийн бус байгууллага хамтран зохион байгуулж байгаа бөгөөд орон нутгийн залуусыг ажил хөдөлмөрт татан оролцуулах, эдийн засгийн идэвхтэй бүлэгт шилжүүлэх бодлогын хэрэгжилтэд чухал хувь нэмэр оруулж байна.

Эх сурвалж: Ховд аймгийн Хөдөлмөр, халамжийн үйлчилгээний газар